Mətbuat-Monitorinq 30.11.15

Rəsmi qəzetlər dövlət başçısı İlham Əliyevin artıq başa çatmış Belarus səfəri ilə bağlı yazıları ilk səhifələrdə yerləşdiriblər.

“Azərbaycan” qəzeti noyabrın 26-da Nardaranda baş vermiş hadisələrlə bağlı “Nardaran hadisələri terrorçuların Azərbaycanda sabitliyi pozmaq cəhdidir” başlıqlı irihəcmli məqalə dərc edib. Bundan əlavə, bu hadisələri pisləyən daha bir neçə mövqe əksini tapıb.

“Xalq qəzeti” Nardaran hadisələrinə dair “Terrorçuların demokratik inkişafa və sabitliyə uzanan əlləri qətiyyətlə kəsliəcəkdir” adlı iri,  5 ədəd isə kiçikhəcmli məqalələr dərc edib.

“Azadlıq” qəzeti rəsmi Bakının MTN-in keçmiş şefi Eldar Mahmudova yaxın şəxsin ölkədən qaçmasından xaricə ciddi kompromatlar ötürülə biləcəyindən narahat olmasını ilk səhifəyə çıxarıb.

“Sevil massivi” mənzil-tikinti kooperetivinin fərdi mənizl tikintisi adı ilə ilə aldatdığı vətəndaşlar pul və əmlaklarını ala bilmədikləri üçün dekabrın 1-də PA önündə aksiya keçirəcəklərini bildiriblər.

Qəzet Nardaran qəsəbə sakinlərinin 43 milyon manat elektirk enerjisi borcu olması haqda aidiyyatı qurumların açıqlamasını “hakimiyyətin Nardarana hirs, hikkə və qəzəb sayğacı”nın hesabladığı “borc” adlandırırlar.

“Azad Avropa” radiosu Nardaran hadisələrini “kasıb azərbaycanlıların hakimiyyətin korrupsiya və əhaliyə laqeyd münasibətinə görə rejimdən çox narazı olması” kimi dəyərləndirib.

Qəzet polisin Nardaran kəndinin giriş-çıxışlarında post qurmasını “hakimiyyətin Nardaranı mühasirədə saxlaması” kimi qiymətləndirir.

Silsilə cinayətlərə görə 2005-ci ildə həbs edilərək ömürlük cəza alan cinayətkar dəstə başçısı Hacı Məmmədov onunla bağlı cinayət işinin yenidən araşdırılmasını istəyir.

Vəkil Qurban Məmmədov “MTN işi” ilə bağlı qanunsuzluğa məruz qalan iş adamları ilə birgə buna qədərki analoji hadisələri araşdırmaq üçün vahid komissiyanın yaradılmasını təklif edib.

“Yeni Müsavat” Nardaranda meydanın boşaldılmasını, barrikadaların sökülməsini yazaraq bunu “ölkəni həyəcanda saxlayan hadisələrin sönməyə doğru üz tutması” kimi önə çəkir.

Deputat Fazil Mustafa İrana işarə ilə Nardaran hadisələrini “qonşu ölkədə hazırlanmış ideoloji layihə” kimi dəyərləndirib. Nardaran hadisələrində İranın rolunun olması haqda iddialara İranın Azərbaycanda səfiri Möhsün Pakayin “Nardaran hadisələrinə heç bir bağlılığımız yoxdur” cavabını verib.

Qəzetin iddiasına görə, deputat Elmira Axundovanın oğlu Həbib Axundovun səs yazısı olan “bu qaqaşı tutmuşuq və gətirmişik bağa, döymürük, heç nə eləmirik... “srok”a göndərmək istəyirik” kimi insan oğurluğu üzə çıxıb.