Mətbuat-Monitorinq 30.12.14

Rəsmi qəzetlər dövlət başçısı İlham Əliyevin Dövlət Neft Fondunun yeni inzibati binasının açılışında iştirak etməsi haqda xəbərini, əfv fərmanının mətnini, ölkənin ictimai-siyasi həyatında fəal iştiraklarına görə spiker Oqtay Əsədovun “Şərəf”, Alı Alıyevin “Şöhrət” ordenlərilə təltif olunmaları haqda sərəncamların mətnlərini ilk səhifələrə yerləşdiriblər.

“Azadlıq” qəzeti yanacağın, qızılın, spirtli içkilərin və avtomobillərin qiymətinin artırılmasının nəzərdə tutulmasını “ölkədə kütləvi bahalaşma” adı ilə manjetə çıxarıb və bunu rəsmi Bakının neftin ucuzlaşmasından itirdiklərini əhalinin pulu ilə kompensasiya etmək istəyilə əlaqələndirir.

Qəzet dövlət başçısı İlham Əliyevin növbəti əfv fərmanı ilə də bütün siyasi dustaqlar azad edilmədiyinə görə sənədi “növbəti əfv manipulyasiyası” adlandırır.

Naxçıvanda həbsdə olan AXCP fəalı Hicran Qasımov müdafiəçisinin təşkili üçün müstəqil vəkil tutulmasını istəyib, Naxçıvanda isə müstəqil vəkil yoxdur.

Tanınmış jurnalist Şahvələd Çobanoğlu rəsmi Bakının “Azadlıq” radiosuna basqılarına “bizi fərqli düşündüyümüzə görə cəzalandırmaq istəyirlər” şərhini verib.

“The New York Times” qəzeti “Azadlıq” radiosuna təzyiqləri rəsmi Bakının “Azərbaycanda inqilab qorxusu” ilə əlaqələndirir.

Milli Şuranın sədri, professor Cəmil Həsənli rəsmi Bakının “Azadlıq” radiosuna basqılarına “antimilli addım” mövqeyini ifadə edib.

AXCP Sabirabad rayon təşkilatı Gənclər Komitəsinin sədri Etibar Fətiyevə 30 sutka həbs cəzası verilib.

Rəsmu Bakının antidemokratik addımları artdıqca beynəlxalq təzyiqlərin də artdığını yazan qəzet 2015-ci il yanvarın 12-də Vaşinqtonda Azərbaycanla bağlı daha bir kritik dinləmənin keçiriləcəyini nəzərə çatdırır.

14 saylı həbsxanada məhbus Elşad Babayevin işgəncə ilə öldürülməsinə etiraz edən məhbusların yaxınları onlarla görüşə bilmədikləri üçün məhbusların işgəncə altında olduqlarını bəyan ediblər.

Deputat Cavid Qurbanov ölkə banklarını “əhalinin başına olmazın oyun  açmaqda” suçlyaraq banklara qarşı “kredit soyğunçuluğu” ittihamı səsləndirib.

“Ekspress” dövlət başçısının imzaladığı əfv fərmanını “bayram əfvi” adı ilə ön plana çıxarıb.

“Yeni Müsavat” qəzeti əfv fərmanı verilməsini ilk plana çıxararaq 5 siyasi məhbusun azad olunmasını nəzərə çatdırır.

Müsavat Partiyasının üzvü olan siyasi məhbus qardaşlar Fərəc və Sirac Kərimlilər təcridxanada onlara qəzet verilməməsindən şikayət ediblər.

Qəzet yeni tikilmiş “Heydər” məscidinin Qafqaz Müsəlmanları İdarəsinin tərkibinə verilməməsini iqtidardakı rəqiblərindən QMİ sədri Allahşükür Paşazadəyə növbəti zərbə kimi dəyərləndirir.    

Kremlin MDB kuratoru Dmitri Roqozin Bakıya səfəri zamanı ölkə rəhbərliyi ilə görüşməsi haqda İTAR-TASS-a açıqlma verib, rəsmi Bakı isə nə üçünsə bu səfəri məxfi saxlayb. 

Suriyada İŞİD terror qruplaşması sıralarında döyüşən və bir ay öncə Azərbaycana dönən Xudat sakini Nadir Əlixanov bu günlərdə həbsə alınıb.