Milli Məclis Şəhərsalma Məcəlləsini qəbul edib

İyunun 29-da Milli Məclis növbədənkənar  plenar iclasında Şəhərsalma və Tikinti Məcəlləsini üçüncü oxunuşda təsdiqləyib.

Parlamentin Hüquq siyasəti və dövlət quruculuğu komitəsinin sədri Əli Hüseynli bildirib ki, məcəllə Amerika Ticarət Palatasının, Azərbaycan Hüquqşünaslar Konfederasiyasının və Almaniya Beynəlxalq Əməkdaşlıq Cəmiyyətinin tövsiyələrinə uyğundur.

Sənəddə ərazi planlaşdırılması, ictimaiyyət üçün şəhərsalma üzrə şəffaf və əlverişli sənədləşmə, fiziki imkanları məhdud şəxslərin ümumi istifadə obyektlərindən istifadə imkanlarının təminatı, tikinti obyektlərinin təhlükəsizliyinin təminatı, tikinti fəaliyyətinin ətraf mühitə təsiri, tikintiyə icazə proseduru və s. əksini tapıb. 

Sənəd tikintiyə “vahid pəncərə” prinsipi üzrə icazə verilməsini nəzərdə tutur. İcazə əlaqədar qurumların və şəxslərin rəyi nəzərə alınmaqla layihənin normativlərə uyğunluğu yoxlandıqdan sonra veriləcək. Yaşayış evlərinin tikintisinə (üç mərtəbədən və 12 m. hündürlükdən çox olmamaqla) icazə sənədləri olmadan, yerli İcra Hakimiyyətini və müvafiq strukturu xəbərdar etməklə başlamaq olar. Ev hazırlanmış layihəyə uyğun olaraq inşa edilməlidir.

İH-nin müvafiq strukturu bir ay ərzində layihə ilə bağlı iradlarını və rəyini bildirməlidir. Əks halda, tikintiyə icazəsiz başlamaq olar.  İH-nin əsaslı iradları mütləq nəzərə alınmalıdır.

Məcəllədə obyektlərin qiymətləndirilməsi prinsipləri də əksini tapıb. Çox güman ki, İH-nin obyektlərin istismara qəbulu və təhvil verilməsi üzrə əsas orqanı FHN olacaq.  Məhz bu qurum tikinti üçün icazə verəcək, ona nəzarət edəcək və obyekti istismara qəbul edəcək. -17B-