Milli Məclisi yenilənmə gözləyirmi?

Milli Məclisdə seçkilər üzrə seçki kampaniyası siyasi süstlük və bir sıra aparıcı müxalifət təşkilatlarının, siyasətçilərin və vətəndaş cəmiyyəti fəallarının seçkilərdə iştirakı ilə bağlı şübhə şəraitində start götürür.

Toplaşmaq, ifadə, birləşmək və KİV azadlığının məhdudlaşdırıldığı, 80-ə yaxın siyasi məhbusun olduğu bir şəraitdə hakimiyyətin bir çox opponentləri seçkiləri boykot etməyə üstünlük verir.

Eyni zamanda, müşahidəçilər parlamentin əhəmiyyətli dərəcədə yenilənəcəyini proqnozlaşdırır, əlbəttə ki, hakimiyyətə loyal şəxslərlə. Parlamentdə gənclərin və qadınların sayının artacağı proqnozlaşdırılır.

Hakimiyyətin bu seçkilərdə yeni siyasi texnologiya tətbiq edəcəyi istisna deyil: İlham Əliyev kursunu dəstəkləyən bir neçə namizədə konkret dairədə deputat mandatı uğrunda mübarizə aparmaq imkanı vermək və son anda kampaniyanı ən uğurlu həyata kçirəcək şəxsin xeyrinə seçim etmək.

Bu texnologiyanın üstünlüyü ondadır ki, saxtalaşdırma ehtiyacı minimum olacaq. Parlamenti yeniləmək və gəncləşdirmək, onun işinə səriştəli və eyni zamanda siyasi cəhətdən loyal deputatları cəlb etmək mümkün olacaq.

Bu, sosial gərginliyin azalmasına şərait yarada bilər və Qərbə islahatlar həyata keçirməyə hazırlıq haqqında mesaj olacaq.

Bu mənada gənc biznes nümayəndələrinin deputatlığa namizədliyinin irəli sürülməsi diqqət çəkir.

Belə ki, Gəncə şəhərinin 40-cı Kəpəz ikinci seçki dairəsində gənc biznesmen, AdCo reklam agentliyinin rəhbəri 29 yaşlı Elnur Eyvazovun deputatlığa namizədliyi irəli sürülüb.

2009-cu ildə o, artıq Kəpəz rayon bələdiyyəsi seçkilərində namizəd olub. O, yerli özünüidarə orqanına seçilməsə də, məhdud resurslara baxmayaraq, 5 minə yaxın səs yığa bilib.

Turan-ın seçkilərin nəticələrinin əvvəlcədən həll olunduğu bir halda seçki kampaniyasında iştirak etməkdə bir məna görüb-görmədiyi haqqında sualına Eyvazov belə cavab verib: “Əlbəttə, Azərbaycanda seçkilərlə bağlı müəyyən stereotiplər var. Amma düşünürəm ki, çoxları sadəcə olaraq öz uğursuzluqlarını və nöqsanlarını bununla ört-basdır edir. Hesab edirəm ki, səmərəli seçki kampaniyası keçirsən, öz proqramını dairə üzrə maksimum çox sayda seçiciyə çatdırsan, onları narahat edən məsələləri dinləsən və problemlərin səmərəli həlli yollarını təklif etsən, seçkilərdə qalib gəlmək olar”.

Eyvazov öz seçki kampaniyasında bir sıra yeni yanaşmalar təklif etmək niyyətindədir ki, vaxtından əvvəl onlar haqqında danışmaq istəmir.

Eyvazov dövlətin siyasi kursunu dəstəkləyir. Lakin siyasətin təkmilləşdirməyə ehtiyacı var və buna gənc nəslin nümayəndələri öz enerjiləri, təşəbbüsləri, mövcud problemlərin həllinə innovativ yanaşmaları ilə töhfə verə bilərlər.

Daha təcrübəli siyasətçilər və oliqarx qrupları tərəfindən irəli sürülən namizədlərlə rəqabətdən qorxmurmu? Bu suala cavabda Eyvazov deyib:

“Mənz öz namizədliyimi doğma Gəncəmdə irəli sürmüşəm, burada sakinləri narahat edən problemləri yaxşı bilirəm. Çoxları da məni şəhərinin patriotu, gənclərə dəstək üzrə sosial layihələri dəstəkləyən iş adamı kimi yaxşı tanıyırlar”. -06D-