Mitinqdə iştiraka görə saxlanılanların sayı 12 nəfərə çatıb (YENİLƏNİB)

Bakı/20.09.56/Turan: Müxalifətin 17 sentyabr mitinqindən sonra saxlanılan daha 8 gənc fəala bazar ertəsi Yasamal məhkəməsi tərəfindən 8 sutkalıq inzibati həbs cəzası verilib.

Ruslan Qara, Nuru Nuruzadə, Elton Əli, Araz Səməd, Məmməd Balaməmmədov, Dəyanət Əliyev, Kazım İmanov və Şəmistan Şahverdiyev polisə tabe olmamaqda ittiham ediliblər.

Digər fəal Nurlan Sarıyev 200 manat cərimə ödədikdən sonra buraxılıb.

Beləliklə, mitinqdə iştiraka görə saxlanılanların ümumi sayı 12 nəfərə çatıb.-06d-

2016 Sentyabr 19 (Bazar ertəsi) 11:53:12

Bakı/19.09.16/Turan: Bazar ertəsi Yasamal Rayon Məhkəməsi AXCP-nin dörd fəalını polisə müqavimət göstərmək ittihamı ilə 8 sutkalığa həbs edib. Bu barədə Turan-a AXCP sədrinin müavini Gözəl Bayramlı bildirib.-16D-

* * *

Bakı/19.09.16/Turan: Milli Şuranın şənbə mitinqindən sonra polisin həbs etdiyi AXCP fəallarının taleyi indiyədək məlum deyil.

Nuru Nuruzadə, Ruslan Qara, Elton Əli və Toğrul İbrahimli Yasamal polisinə aparılıb, bir neçə saatdan sonra rayon məhkəməsinə göndəriliblər. Lakin sonra yenidən onları Yasamal polisinə qaytarıblar.

Məhkəmə onların işinə baxmayıb və bunun nə zaman olacağı məlum deyil. Bu barədə Turan-a AXCP sədrinin müavini Gözəl Bayramlı bildirib. Onun sözlərinə görə, polis gənclərin  taleyi haqda açıqlama verməkdən imtina edir. “Onlar təkcə bizə yox, gənclərin ailəsinə də məlumat vermirlər. Odur ki, biz güman edirik ki, onlara işgəncə verirlər, ya da ciddi təzyiq göstərirlər”, - G.Bayramlı qeyd edib.

Bunu vəkil Əsabəli Mustafayev də Turan agentliyinə təsdiqləyib. “Bizə heç bir məlumat vermirlər. Vəkilin order ala bilməsi üçün hansısa bir ittiham irəli sürülməlidir – ya inzibati ya cinayət. Tutulanların yaxınları mənimlə daim əlaqə saxlayırlar. Polis saxlanılan şəxsləri onların istədikləri vəkillə təmin etməlidir, ancaq praktikada bu hüquq çox zaman pozulur.

İttiham irəli sürülmədən, yanına vəkil buraxılmadan gənclərin iki sutka polisdə saxlanması kobud qanun pozuntusudur”, - vəkil vurğulayıb.

Xatırladaq ki, Milli Şuranın şənbə mitinqi başa çatdıqdan sonra polis aksiyadan gedən fəallara hücum edərək zorakılıq tətbiq edib . 40-a yaxın adam saxlanılıb. Onların arasında jurnalistlər də olub. Sonradan onları buraxıblar. Lakin adları açıqlanan dörd nəfər qalıb. DİN-in rəsmi məlumatda bəzi mitinqçilərin ictimai asayişi pozduğu bildirilir.-16B-

2016 Sentyabr 18 (Bazar) 15:43:55

Milli Şuranın şənbə mitinqindən sonra bir neçə jurnalist də daxil olmaqla, 37 nəfər saxlanılıb. Saxlama səbəbsiz və kobud şəkildə aparılıb. Bəziləri döyülüb. Onları Yasamal polisinə aparıblar və bir neçə saat orada saxlayıblar. Saxlanılanların əksəriyyəti AXCP gənclər şöbəsinin üzvləridir. Bu barədə Turan-a AXCP sədrinin müavini Gözəl Bayramlı bildirib.

Onun sözlərinə görə, beş gənci məhkəməyə aparıblar. Bunlar Nuru Nuruzadə, Ruslan Qara, Elton Əli,  Toğrul İbrahimli, İlkin İsmayıllıdır.  Görünür, onları polisə müqavimətdə ittiham edəcəklər və bir neçə sutkalığa həbs edəcəklər, AXCP-də belə hesab edirlər.

Öz növbəsində Bakı Şəhər Baş Polis İdarəsindən bildirilib ki, aksiya iştirakçılarının bəzisi ictimai asayişi pozub.-16D-