Müdafiə komitəsi siyasi məhbuslara azadlıq tələb edir

Leyla Yunus və digər siyasi məhbusların Hüquqlarını Müdafiə Komitəsi (HMK) siyasi həbslərə etiraz bəyanatı yayıb.

Bəyanatda hakimiyyətin vətəndaş cəmiyyətinə qarşı repressiyası, yeni həbslər pislənilir. Əliyev rejiminin total saxtakarlıqla keçirilən seçkilər nəticəsində hakimiyyəti mənimsədiyi, indi isə ictimai-siyasi fəalları təqib yolu ilə əlində saxlamaq üçün ictimai-siyasi fəalları təqib etdiyi qeyd olunur. “Öz miqyasına və amansızlığına görə bu repressiyaları müstəbid rejimlərdəki təqib və zorakılıqlarla müqayisə etmək olar”, deyə müəlliflər qeyd edirlər.

“Azadlıq” qəzetinin əməkdaşı Seymur Həzinin saxta ittihamlarla həbsə alınması rəsmi Bakının müstəqil mətbuat önündə qorxusunun və müstəqill mətbuata qarşı patoloji nifrətinin göstəricisi kimi dəyərləndirlir. S.Həzinin həbsini müəlliflər həm hakimiyyətin kriminal, korrupsioner, rüşvətxor mahiyyətini açan müstəqil mətuata, həm Milli Şuraya basqı kimi qiymətləndirirlər. S.Həzinin xuliqanlıq ittihamı ilə saxlanılmasına hakimiyyətin azadfikirliliyə qarşı belə iyrənc üsullarla mübarizə aparmasının sübutu kimi yanaşılır. Bu tipli həbslərin ölkənin beynəlxalq imicinə zərbə vurduğu iddia edilir.

Sənəddə daxili işlər naziri Ramil Usubovun Ziyalılar Birliyinin sədri Eldəniz Quliyevə qarşı qaldrıdığı məhkəmə iddiası əsassız sayılır və bu iddia bir şəxsə yox, ölkədə ziyalılığa qarşı qaldırılmış iddia sayılır. Nazirin bu addımı vətəndaş tərəfindən daxili işlər orqanının ünvanına səsləndirilən tənqidi fikirləri  boğmaq hesab edilir.

Təəssüf doğuran haldır ki, rejim öz rəqiblərinə qarşı sərgilədiyi qanunsuz mübarizəni qeyri-sivil, anti bəşəri metodlardan istifadə edərək aparır. Milli Şuranın Mətbuat Xidmətinin rəhbəri, hüquq müdafiəçisi Oqtay Gülalıyevin azyaşlı oğlu haqqında AR CM-in 221.1-ci maddəsi ilə cinayət işi açıb, iş materiallarını məhkəməyə göndərmək deyilənlərə misaldır. Maraqlıdır ki, 1 il öncə -2013-cü ilin sentyabrında naməlum şəkildə bir qrup tərəfindən vəhşicəsinə döyülüb bıçaqlanaraq ölümdən dönən məktəbli Əli Gülalıyev zərərçəkmiş şəxsdən sonradan təqsirləndirilən şəxsə “çevrilir”. Cinayət işinin istintaqını “şikayət”dən 1 ildən sonra birbaşa Bakı şəhər Baş Polis İdarəsinin Ağır Cinayətlər şöbəsinin aparması prosesin qurama və sifarişli olduğunu ortaya qoyan məqamlardandır.

Müəlliflər rejimi rəqiblərinə qarşı mübarizəni qeyri-sivil, anti-bəşəri metodlardan istifadə etməklə aparmaqda ittiham edirlər. Milli Şuranın mətbuat xidmətinin rəhbəri Oqtay Gülalıyevin oğlu cinayət işində bir il öncə zərərçəkən kimi tanınır, bir ildən sonra isə atasının siyasi mövqeyinə görə oğlunun “təqsirkar” şəxsə döndərildiyi nəzərə çatdırılır.

Müəlliflər bir daha mətbuat təmsilçilərinə, ictimai-siyasi fəallara qarşı həyata keçirilən repressiyaları qətiyyətlə pisləyir, bu siyasətin dayandırılmasını, həbsdə olan bütün siyasi məhbusların qeyd-şərtsiz azad olunmasını tələb edir. -05D-