«Müdafiəçi» Mərkəzi Azərbaycanın quru sərhədlərinin açılması tələbi ilə kampaniyaya başlayır

“Müdafiəçi” Hüquq Mərkəzi Azərbaycanın quru sərhədlərinin açılması tələbi ilə ictimai kampaniyaya başlayır.

Belə ki,  Nazirlər Kabinetinin quru sərhədlərinin qapalı saxlanılması ilə bağlı qərarından Azərbaycan Konstitusiya Məhkəməsinə kütləvi şəkildə fərdi şikayətlərin verilməsi təklif edilir.

“Artıq beş ilə yaxındır ki, Azərbaycanın quru sərhədləri COVID-19 pandemiyası bəhanəsi ilə bağlıdır. Sərhədlərini bağlayan ölkələr bu qərarları 2022-ci ildə ləğv etdilər. ÜST 2023-cü ildə pandemiyanın başa çatdığını elan etdi. Sərhədlərin bağlı saxlanmasının heç bir hüquqi əsası və əhalinin sağlamlığı baxımından  da məqsədəuyğunluğu yoxdur”, - «Müdafiəçi» Mərkəzinin rəhbəri Səməd Rəhimli Turan-a bildirib.

Bu məhdudiyyət qeyri-legitimdir, çünki Konstitusiya və Avropa Konvensiyasının təmin etdiyi hərəkət azadlığını pozur,  deyə o vurğulayıb.

Rəhimli  əlavə edib ki, qanunsuz məhdudiyyətin ləğvi üçün sivil mübarizə yolu Konstitusiya Məhkəməsinə kütləvi şəkildə fərdi şikayətlər verməkdədir.

Onun sözlərinə görə, sərhədlərin bağlı olması  həm də vətəndaşlara maddi sıxıntılar yaradır, onları hava yolu ilə getməyə məcbur edir ki, bu da dəfələrlə baha başa gəlir.

“Aviabiletlərin baha olması səbəbindən bəzi vətəndaşlar, məsələn, illərlə başqa ölkələrdəki qohumlarına baş çəkə bilmir, müalicəyə gedə bilmir və başqa məqsədlər üçün səyahət edə bilmir», - deyə Rəhimli qeyd edib.

O vildirib, bayram günlərindən  sonra “Müdafiəçi” mərkəzi Konstitusiya Məhkəməsinə şikayətlərin verilməsi üçün hazır nümunələr təqdim edəcək.

Rəhimli qeyd edib ki, Konstitusiya Məhkəməsi ərizələri qəbul etməkdən imtina edərsə və ya təmin etməzsə, o zaman “Müdafiəçi” mərkəzi vətəndaşların AİHM-ə şikayət etməsinə kömək etməyə hazırdır.