Müəllimə korrupsiya faktı ilə bağlı məmurlar önündə açıqlama verdi

Çərşənbə günü Beynəlxalq Mətbuat Mərkəzində (BMM) keçirilən “Korrupsiya faktlarını ifşa edən şəxslərin hüquqlarının qorunması” konsepsiyasının təqdimatı mərasimində tədbir iştirakçısı Zemfira Şəfiyeva korrupsiya faktları açıqlayıb.

Z.Şəfiyeva özünün 31 ildən, həyat yoldaşı Rafiq Şəfiyevin isə 35 ildən çoxdur ki, Naxçıvanski hərbi liseyində dərs dediyini xatırladıb. Bütün sahələrdə korrupsiyanı pisləyən Z. Şəfiyeva təhsil sahəsində bunun dözülməz olduğunu bildirib.

Onun sözlərinə görə, liseylə NATO əməkdaşlığı dövründə, yəni 2006-cı ilə kimi məktəbdə hər-hansı rüşvət və ya korrupsiya faktı olamayıb. Almazov adlı şəxs 2003-cü ildə liseyə rəis təyin edilib. Z.Şəfiyeva deyib ki, liseyə polkovnik rütbəsilə gələn Almazov cəmi bir aydan sonra general-leytenant hərbi rütbəsi alıb. 2005-ci ildə NATO ilə əməkdaşlıq dövrü başa çatıb. Türk hərbi müəllimləri müqavilə şərtlərinə əsasən işlərini başa çatdırıb, liseydən gediblər. 

2006-cı ildən rüşvət məktəbə ayaq açıb. Onun sözlərinə görə, lisey rəhbərliyi kursantların aldıqları 50 manata belə “gözlərini” dikiblər. Rüşvət vermək istəməyən kursantlara “psixi problemli uşaqlar” adı qoyulur. Z.Şəfiyeva deyib ki, hətta şəhid övladından belə rüşvət tələb ediblər.

Kusantların test imtahanlarının nəticələri 3 dəfə dəyişdirilir. Kursantların mobil telefonları əllərindən alınır, sonra pul müqabilində onlara qaytarılır. Bütün bunıara narazılıq etdikdə Rafiq və Zemfira Şəfiyevaların dərs yükləri 24 saatdan 21 saata, daha sonra 21 saatdan 15 saata, daha sonra isə 12 saata endirilir.

Keçən il isə lisey rəhbərliyi hər iki pedaqoqu Əmək Məcəlləsinin 72-ci maddəsilə işdən azad edib.

Yeri gəlmişkən, Z.Şəfiyeva bu açıqlamanı verərkən ölkə prokurorluğu yanında Korrupsiyaya qarşı Baş Mübarizə İdarəsini, Ədliyyə Nazirlyinin əməkdaşları zalda idilər və açıqlamasını dinləyirdilər. -05C-