“Murov” şirkətinin işi üzrə prosesdə məhkəmə iştirakçılarına və jurnalistlərə təzyiqlər baş verir

Bakı/21.02.23/Turan: Fevralın 20-də Bakı Ağır Cinayətlər Məhkəməsində “Murov” tikinti şirkətinin sahibi, Azərbaycan Dəmir Yolları QSC-nin tikinti işlərinin podratçısı Əfqan Zeynalovun bu şirkətin kadrlar şöbəsinin keçmiş rəhbəri Nelli Fabriçnayaya qarşı iddiasına baxılması davam edib.

Hakim Faiq Qəniyevin sədrliyilə məhkəmə “Murov” şirkətinin seyfindən təxminən 400 min dolların (720 min manat) oğurlanmasında Fabriçnayanın günahkar olub-olmadığına qərar verməlidir.

Məhkəmə prosesi hakim və prosesi işıqlandıran Turan agentliyinə təzyiq faktları ilə xarakterizə olunur. Ötən iclasda Fabriçnayanın vəkili Qəzənfər Rzayev məşvərət otağında Zeynalovla hakim Qəniyev arasındakı dialoqa etirazını hakimin diqqətinə çatdırıb.

"Məşvərət otağına kənar şəxslərin daxil olması qadağandır, təkcə bu fakt məhkəmənin qərarını ləğv etmək üçün kifayətdir", - Rzayev Turan ilə söhbətində deyib. Dünən isə həmin vəkil və digərləri məhkəmə zalında iclas başa çatdıqdan sonra Zeynalovun məhkəmədəki suallara onun istədiyi kimi cavab verməyən şahid Mehriban Atakişiyeva ilə  sərt tonda danışdığını görüblər.

Atakişiyeva “Murov” şirkətində təmizlikçi işləyib, hakimin və ittiham tərəfinin  vəkilinin suallarını cavablandırıb.

Turan agentliyi də Zeynalovun vəkilləri tərəfindən təzyiqlərə məruz qalıb. Onlar məhkəməyə şikayət edərək onların fikrincə,  prosesi qeyri-obyektiv işıqlandıran müxbirlə məşğul olmağı xahiş ediblər. Vəkillər bildiriblər ki, Turan prosesi yalnış  işıqlandırır, agentliyə qarşı məhkəmə iddiası qaldırmağa hazır olduqlarını deyiblər. Turan müdafiəçi İlhamə Həsənovaya təklif edib ki, məqalələrdə yazılanların həqiqətəuyğun olduğuna əmin olmaq üçün vəkil Qəzənfər Rzayevin iştirakı ilə məhkəmə iclaslarının videoyazılarına baxsın.

Lakin videogörüntülərin izlənilməsinin təmin olunması ilə bağlı onun tərəfindən BAM-a müraciət edilməyib.

Mətbuata təzyiqin başqa bir forması Turan və digər KİV-ə göndərilən məktublar olub. Həmin məktublarda özünü Zeynalovun qohumu elan edən  “Moderator” saytının baş redaktoru bu proses haqda məqalələrin yayımlanmasının dayandırılmasını tələb edib və bildirib ki, agentliyə qarşı məhkəməyə şikayət edilib. Bu, keçən ilin noyabrında olub. Turan-a qarşı məhkəmə iddiası indiyədək yoxdur. “Moderator”un baş redaktorundan Turan-a daxil olan müraciət yalan ifadələrlə doludur və Turan-ın ittihamçıya qarşı iddiasına səbəb ola bilər.

Onun agentliyin “Murov” şirkətinin iddiası üzrə proses barədə reportajların dərcini dayandırması üçün nüfuzlu jurnalistlərdən Turan-a təsir göstərmələrini xahiş etməsi də uğurla nəticələnməyib.

İndi də dünənki məhkəmə haqqında. Hakim “Murov” şirkətinin təmizlikçisi Mehriban Atakişiyevanın ifadələrini dinləyib, o, əsasən Vəkil İ.Həsənovanın suallarını cavablandırıb. Atakişiyeva bildirib ki, evini təmir etdirmək, məişət texnikası almaq üçün Fabriçnaya ona 50 min manat verib, oğluna avtomobil almaq üçün bir az pul xərclənib. Atakişiyeva çox kasıb şəraitdə yaşayıb, himayəsində iki xəstə ailə üzvü var. O, Zeynalovun ondan götürülmüş vəsaiti geri qaytarmaq tələbilə yaranan qalmaqalı biləndən sonra bu pulu Nelliyə qaytarıb. Qohumlarından borc və bankdan kredit götürərək geri qaytarıb. Atakişiyevanın sözlərinə görə, o, həmin 50 mini yardımı adları ona məlum olmayan xeyirxah zəngin adamların yardımı hesab edib.

Vəkil Rzayevin sualının cvabında Atakişiyeva etiraf edib ki, Nellidən 50 min manat alıb, ancaq Zeynalova 70 min manat qaytarıb. Bu fərqin səbəbi açıqlamayıb. Vəkil Rzayev Turan-a izah edib ki, bu əlavə 20 min manatı Zeynalova ona görə verib ki, baş verənlərə görə onu cəzalandırmasın.

Atakişiyeva Zeynalova içəcək verərkən ona nəsə qarışdırıb-qarışdırmaması ilə bağlı vəkil Həsənovanın suallarına müsbət cavab verməyib. Təmizlikçi bildirib ki, Əfqanın mənzilinə təmizlik işləri görmək üçün gedib, ancaq müalicədə iştirak etməyib.

Atakişiyeva Nellinin dostu Rauf Zulfuqarovla tanış deyil, onu görməyib. O, şirkətdən pul oğurlanmasında iştirakı ilə bağlı Nellinin iddialarını rədd edib. Onun oğlunun Fabriçnayanı təhdid edərək  özünü ələ verməsini tələb etməsilə bağlı Nellinin istintaqda dediklərini də inkar edib.  "Heç kim onu təhdid etməyib və döyməyib. Nelli elə biri deyil ki, onu təhdid etmək mümkün olsun", - Mehriban Atakişiyeva qeyd edib.

O deyib ki, alınan pullarla dualar sifariş edirdi ki, Fabriçnayanın ailə mübahisələri həll olunsun, Nelli və Əfqan arasında münasibətlər yaxşılaşsın.

Gözlənilmədən Əfqan Zeynalov ayağa qalxıb və Nelli Fabriçnayanı özünəməxsus şəkildə müdafiəsinə dair çıxış edib. O, hakimə deyib ki, Nellini hamıdan yaxşı tanıyır, o, heç vaxt onun pullarını təkbaşına oğurlamağa cəsarət etməz, mütləq bunu başqasının göstərişilə və başqaları ilə birlikdə edib. Məhkəmə işi yeni istintaqa qaytarmalı və bütün oğruları müəyyənləşdirməlidir.

"Onu götürməyə məcbur ediblər. Bütün günahı Nellinin üzərinə qoymaq olmaz. Hətta həbsdə olsa da, hansısa bir şəkildə azadlığa buraxılacağını vəd edərək bütün günahı öz üzərinə götürməyə məcbur edirlər", -Zeynalov deyib. O, məhkəmədən M.Atakişiyevanın iştirakı ilə audioyazıların dinlənilməsini tələb edib.

Hakim Ə.Zeynalov, R.Zülfüqarov və digərlərinin  iştirakı ilə Fabriçnayanın telefon danışıqlarının oxunmasına başlayıb. Söhbətlərdə Fabriçnaya deyirmiş ki, Zeynalovun qarşısında günahkardır, əməlindən əziyyət çəkir, ancaq əzabının səbəbini izah etmir. Nelli SMS-lərin birində yazır ki, Əfqandan 400 min manat oğurlayıb. Ondan istifadə ediblər, Zeynalov onunla birlikdə olub, münaqişə baş verəndə isə onu atıb. Zülfüqarov ilə telefon söhbətində Fabriçnaya Zeynalovun onu təhdid etməsindən, döyməsindən, özünü ələ verməyə məcbur etməsindən danışıb.

Təəccüblənir ki, məhkəmə prosesi zamanı əvvəlcə 300 min manatın, sonra 400 min manatın oğurlanmasından söhbət gedib, sonra rəqəm 500 minə yüksəlib.

Daha sonra Əfqan Zeynalovla söhbətində Nelli Zulfuqarovun onu şantaj edərək 120 min manat tələb etdiyini bildirib. O, Atakişiyevanın onu Zeynalovu aldatmağa necə məcbur etdiyindən də danışıb.

Martın 16-da növbəti məhkəmə iclasında vəkillərin vəsatətləri, sonra proses tərəflərinin əsas çıxışları dinləniləcək, - hakim F.Qəniyev bildirib.

Bu proses haqda əvvəlki məqalələr:

Şübhəli məhkəmə

Bakı Ağır Cinayətlər Məhkəməsində Turan agentliyinin ünvanına ittihamlar səslənib

Şahidlər “Murov” şirkətində pul oğurluğunu təsdiqləmirlər

Bəzi məhkəmələr humanistləşdirilmə ilə bağlı prezidentin sərəncamını icra edirlər, bəziləri yox

Şübhəli məhkəmə: İttihamçının bacısı prosesə kidneppinqlə bağlı yeni detektiv qeydləri təqdim edib

İttihamçı Zeynalov məhkəmədən işin yeni istintaqa qaytarılmasını xahiş edir

Ağır Cinayətlər Məhkəməsində ittihamçı hakimin yanında şahidi hədələyib

Nelli Fabriçnayanın işi üzrə məhkəmədə okkultist ortaya çıxıb

İttiham tərəfinin yeni vəkili öz müvəkkilinə qarşı faktları üzə çıxarır

Şübhəli məhkəmə: Şübhələr getdikcə artır

Vəkil məhkəmədə "sevgili" sözünün işlədilməsinin əleyhinədir. Hakim razılaşıb

Məhkəmə “Murov” şirkətində əxlaq və pullar haqda ifadələri dinləyib