Müstəqil mətbuat Elmar Hüseynovun xatirəsini yad etdi

Azərbaycanın müqtəqil mətbuatı bazar günü 9 il əvvəl xaincəsinə qətlə yetirilən “Monitor” jurnalının redaktoru Elmar Hüseynovun xatirəsini yad edib. Bu ənənəvi aksiya zamanı onun kimi azadlıq və demokratiya idealları uğrunda mübarizə aparanlar Elmarın məzarı üstünə yığışır.

Ənənəyə uyğun olaraq, mərhum jurnalistin məzarına qərənfillər qoyulub, söz azadlığını müdafiə edən çıxışlar edilib.

2 mart 2005-ci ildə Elmar Hüseynovun qətli jurnalist camiəsinə əlavə qorxu və özünüsenzura elementi gətirdi. Bu, hakimiyyətin KİV üzərində total nəzarətini asanlaşdırdı. Çıxış edənlərin qeyd etdiyi kimi, bu taktika müvəqqəti effekt verdi. İntrenetin inkişafı və ön səhnəyə yeni gənclərin çıxması hakimiyyətin bu səylərini boşa çıxardı.

Həmin gün aksiya iştirakçıları Elmar Hüseynovun və publisist Rafiq Tağının qətlində müqəssir olanları cəzalandırmaq çağırışı ilə prezident İlham Əliyevə müraciət hazırlayıb.

Aksiya axşam saat 19.00-da Elmarın yaşadığı və qətlə yetirildiyi evin qarşıısnda  davam edib. Ənənəyə əsasən, 8 ildir ki, dostları və həmfikirləri qətlin törədildiyi vaxt onun evinin girişində şam yandırır.

“Monitor” jurnalının redaktoru Elmar Hüseynov naməlum şəxs tərəfindən qətlə yetirilib. Qatil tapançadan ona 7 güllə atıb. Bir müddət sonra hakimiyyət bəyan etdi ki, qətli Gürcüstan azərbaycanlıları Teymuraz Əliyev və Tahir Xubanov həyata keçirib. Amma Gürcüstan hakimiyyəti onları verməkdən imtina edibvə  bildirib ki, onlar qətldə iştirak etməyiblər.

Sonra qanqster qrupunun rəhbəri, Azərbaycan DİN cinayət-axtarış polkovniki Hacı Məmmədov qətli təşkil etdiyini bildirdi. Amma hakimiyyət onun bəyanatını təhqiq etmədi.

Daha bir versiyanı jurnalist Eynulla Fətullayev irəli sürdü: o bildirdi ki, qətli MTN polkovniki Akif Çovdarov təşkil edib və bunu MTN-in izolyatorunda 2007-ci ildə həbsdə olanda ona etiraf edib.