Müxalifət Respublika Gününü qeyd etdi

Bakı/28.05.17/Turan: Bu gün Müsavat Partiyası və Milli Şura növbə ilə Respublika Günü münasibətilə Azərbaycan Xalq Cümhuriyyətinin (AXC) banilərindən biri Məmməd Əmin Rəsulzadənin Novxanı qəsəbəsindəki abidəsi önündə mitinq keçiriblər.

Şərqdə ilk demokratik respublikanın banilərinin xidmətlərini yada salan mitinq iştirakçıları indiki hakimiyyəti Rəsulzadə ideyalarının unudulmasında, demokratiya və ədalət normalarından geri çəkilməkdə, milli sərvətlərin talanmasında və korrupsiyada ittiham ediblər.

Tarixçi Nəsiman Yaqublu xatırladıb ki, Azərbaycan demokratik respublikasının baniləri demokratik ideologiya, vətəndaş hüquqları, hamının qanun qarşısında bərabərliyi, seçki hüquqi, gender bərabərliyi və s. gələcək nəsillərə ötürüblər.

1991-ci ildə demokratik respublikanın bərpasına ikinci cəhd oldu. Elçibəyin rəhbərliyilə demokratik qüvvələr müstəqil Azərbaycan Respublikasını AXC-nin varisi elan etdi. Ancaq bu dəfə də indiki rejim Rusiya və İranın dəstəyilə demokratik hakimiyyəti devirdi, insan hüquqlarını və vətəndaş azadlığını pozan avtoritar və korrupsiyaya uğramış idarəçilik yaratdı, -Strateji Düşüncə Mərkəzinin rəhbəri, müsavatçıların kumiri İsa Qəmbər bildirib. "Ancaq əmin olun ki, yaxın gələcəkdə biz Azərbaycanda demokratiyanı bərqərar edəcəyik və ilk respublikanın ideyalarını həyata keçirəcəyik", - o vurğulayıb.

Bu gün Azərbaycan xalqı özünün ilk respublikası ilə fəxr edir, ancaq bu gün onun ləyaqətini aşağılayan respublika ilə yox, - Müsavat Partiyasının sədri Arif Hacılı qeyd edib. "Bu gün bu xalq İranda və digər ölkələrdəki 30 milyonluq azərbaycanlı əhaliyə görə məsuliyyət daşıyır və Azərbaycan üzərində öz hakimiyyətini mütləq bərpa edəcək, - o vurğulayıb.

AXCP sədri Əli Kərimli 28 may - Müstəqillik Gününü 99 il öncə xalqın yaratdığı müqəddəs bayram adlandırıb. "Sovet hakimiyyəti onu bizdən almaq istədi, indi də hazırkı rejim - kommunist rejiminin varisi buna cəhd edir. Ancaq bu xalq AXC banilərinin bizə qoyub getdiyi müstəqillik və dəyərlərdən imtina etməyəcək", - Ə.Kərimli bildirib.

Mitinqdə Respublika Günü ərəfəsində AXCP sədrinin müavini Gözəl Bayramlını uydurma ittihamla həbs edən hakimiyyətin hərəkəti pislənilib. Bu ittihamlar "İstefa!" şüarı ilə qarşılanıb.

Müxalifət liderləri bildiriblər ki, Azərbaycanda demokratiya uğrunda mübarizə onun təntənəsinə qədər davam edəcək və bu dəfə tamamilə və qəti şəkildə.

Ümumilikdə müxalifət qüvvələrinin aksiyasında bir neçə min adam iştirak edib. Mitinqlər insidentsiz keçib.-0-