Naməlum şəxslər vətəndaş fəalı Samirə Ağayevanı qorxudublar

Ötən gün bir qrup naməlum şəxs tanınmış vəkil, hüquq müdafiəçisi və vətəndaş fəalı Samirə Ağayevaya hədə-qorxu gəlib. Hadisə saat 22:30-a yaxın S.Ağayevanın evinin yaxınlığında baş verib.

İçərisində 2 nəfərin olduğu Jeep markalı avtomobil onu avtobus dayanacağından evə qədər izləyib. Blokun qabağında yüksək sürətlə S.Ağayevanın  üstünə sürməyə cəhd edib. S.Ağayeva blok tərəfə keçib və  maşın arxaya sürüb.

“Qaranlıq olduğu üçün maşının nömrəsini görə bilmədim.

Yuxarı qalxdım, balkondan baxdım. Maşın 5 dəqiqə gözlədi və getdi”, - S. Ağayeva Facebook səhifəsində yazıb.

Fəal baş verənləri onu qorxutmaq cəhdi kimi qiymətləndirib. O, Turan-ın müxbirilə söhbətində bildirib ki, bu, çox güman ki, onun hüquq-müdafiə və siyasi fəaliyyəti (S.Ağayeva D18 Hərəkatının sədr müavinidir), məhkəmələrdə vətəndaşların hüquqlarını müdafiə etməsilə bağlıdır.

Hüquq müdafiəçisi polisə müraciət edib-etməyəcəyi barədə sualın cavabında deyib ki, avtomobilin nömrəsini görməyib, yaşadığı evin həyətində isə müşahidə kamerası yoxdur.—06D-