«Nardaran-2» işi üzrə məhkəmədə

Bu gün Bakı Ağır Cinayətlər Məhkəməsində “Nardaran işi-2” üzrə prosesdə müttəhimlər ifadə veriblər. İş üzrə “Müsəlman Birliyi” Hərəkatının sədr müavini Elçin Qasımov və 11 dindar keçir.

Xatırladaq ki, E.Qasımov 2015-ci ilin noyabrında həbs edilib. Sonradan onu hakimiyyətin ələ keçirilməsinə cəhddə, terrorizmdə və digər cinayətlərdə ittiham ediblər. Analoji ittihamlarla daha 10 nəfər həbs edilib: Ağa Yəhyayev, Mahir Qəhrəmanov, Seyfəddin Şirvanov, Ramil Əliyev, Fərhad Muradov, Elgün Axundov, Vüsal Alış, Seymur Aslanov, Əli Şahbazov, Əmirəli Əliyev və İsa İbrahimov.

Bugünkü iclasda Fərhad Muradov ifadə verib: “Evə 4-5 maşında polis işçiləri gəldi. Onlar axtarış apardılar, yataq otağında şkafa sellofan paket qoydular və özləri də onu “tapdılar”. Paketdən qumbara fitili, trotil şaşka, 6 ədəd “Taleh Bağırzadənin müraciəti” adlı broşür çıxdı. Sonra məni maşına oturdaraq “bandotdel”ə apardılar.

Orada təklif etdilər ki, kitabçanı naməlum adamlardan aldığımı, silahı isə Nardaranda zibillikdən tapdığımı etiraf edim. Dedilər ki, əgər ifadə verməsəm, qardaşımı tutacaqlar. Odur ki, etirafedici ifadə verdim”, - F.Muradov bildirib.

Fasilədən sonra müttəhim İsa İbrahimov ifadə verib. O bildirib ki, Nardaran hadisələri zamanı Azərbaycanda olmayıb. O, İrandan ziyarətdən dönərkən sərhəddə saxlayıblar və “bandotdel”ə aparıblar.

“Orada Kərim Əlimərdanov şallağı çıxarıb başımdan vurmağa başladı. O, şallaq ilə uzun müddət mənə hər cür əziyyət verdi. Nəticədə 27 yaşımda ikən əl ağacının köməyilə gəzirəm”, - müttəhim bildirib.

Sonra o, Lənkəranın başçısı Taleh Qaraşovun məhkəməyə çağırılmasını tələb edib. Belə ki, T.Qaraşov  guya İ.İbrahimovun Taleh Bağırzadə və ilahiyyatçı Zülfüqar Mikayılzadənin göstərişilə iğtişaşlar hazırlaması barədə xasiyyətnamə yazıb.

Vəsatət təmin olunmayıb. Proses növbəti cümə günü davam edəcək.—06D--