Nardaran blokada vəziyyətindədir

  Nardaran qəsəbəsi demək olar ki, blokada vəziyyətindədir. Şənbə günü qəsəbəyə giriş gücləndirilmiş polis nəzarətinə götürülüb. Giriş və çıxış məhdudlaşdırılıb. İkinci sutkadır ki, qəsəbəyə elektrik enerjisi verilmir, stasionar telefon xətti kəsilib. Yaxınlıqdakı yanacaq doldurma stansiyaları bağlanıb. Çörək və digər ərzaq məhsullarının gətirilməsində problem  yaranıb.

  Xatırladaq ki, noyabrın 26-da Nardaranda dindarlara qarşı xüsusi əməliyyat keçirilib. Nəticədə 14 nəfər saxlanılıb. Onların arasında “Müsəlman birliyi” Hərəkatının lideri Taleh Bağırzadə də var. Hadisə zamanı 2 polis işçisi və 4 mülki şəxs həlak olub. Sonradan daha bir dindar ölüb. Şənbə günü axşam qəsəbədə vəziyyət gərgin olaraq qalıb.

  Qəsəbə ağsaqqallarından biri Natiq Kərimov Turan-ın müxbirinə bildirib ki, vədlərə baxmayaraq, həlak olanların cəsədləri şənbə günü verilməyib.

  Mülki şəxslər arasında qurbanların sayı beş nəfərə çatıb. İnsident zamanı həlak olan Abbas Hüseyn Gəncə, Sarvan Səfərov isə Masallı sakinləridir. Əkbər Babayev, Fərahim və Rafael Bünyadov qardaşları Nardaranda dəfn ediləcəklər.

  “Rəsmi şəxslərdən kim cəsədlərin veriləcəyini vəd edib” sualının cavabında N.Kərimov deyib: “Bizimlə heç kim danışmaq istəmir, bizi heç kim dinləmir. Lakin Bakıda əslən Nardarandan olan hörmətli şəxslər var. Onlar danışıqlar aparırlar. Yəqin, cəsədləri sabah gətirərlər. Bizim nümayəndələrə deyiblər ki, ekspertiza ilə əlaqədar cəsədlərin verilməsi yubadılır”.

  O, saxlanılan yaralıların taleyilə bağlı məlumatın olmadığını bildirib.

  N.Kərimovun sözlərinə görə, noyabrın 27-dən qəsəbədə faktiki olaraq pasport rejimi tətbiq edilib.

 Polis girişlərdə nəzarəti gücləndirib.   Maraqlıdır ki, Nardarana qeydiyyatı olmayanların girişinə məhdudiyyətlərin qoyulması ilə yanaşı nardaranlıların çoxu da qəsəbədən buraxılmır. “Axşam və bu gün adamlar işə, dərsə gedə bilməyiblər. Bakıxanov qəsəbəsində çörək zavodunda çalışan bir neçə  nardaranlı işdən çıxarılıb”, - N.Kərimov bildirib.

  İkinci sutkadır ki, qəsəbədə elektrik enerjisi, stasionar telefon rabitəsi yoxdur.

  N.Kərimovun sözlərinə görə, sakinlər ağacları kəsib odun kimi istifadə etməyə məcbur olub.

  Yaxınlıqda yerləşən iki yanacaq doldurma stansiyası bağlanıb.

  Çörək və digər ərzaq mallarının gətirilməsində problem yaranıb. Maşınların çoxu qəsəbəyə buraxılmır.

  Amma İmam Hüseyn meydanında nardaranlıların kütləvi toplaşması davam edir. Onlar işıq və isinməkdən ötrü tonqal qalayırlar–06С--