«Nardaran işi»ndə hakim təqsirləndirilənlərin iştirakı olmadan iclas kecirib

Dekabrın 2-də Bakı Ağır Cinayətlər Məhkəməsində “Müsəlman Birliyi” hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və digərlərinin məhkəməsi keçirilib.

Hakim Əlövsət Abbasovun sədrlik etdiyi iclasda təqsirləndirilən şəxslər iştirak etməyib. Vəkil Nemət Kərimli təqsirləndirilən şəxslərin iclasdan nə vaxta qədər təcrid olunmalarını soruşub. Hakim deyib ki, nə vaxt məhkəmə qərar versə, onda təqsirləndirilən şəxslər iclasa gətiriləcəklər. Vəkil N.Kərimli isə müdafiə etdiyi Abbas Hüseynovla görüşüb məslətləşmək istəyib. Hakim təcridxanada və məhkəmədə onların görüşə biləcəklərini deyib.

Vəkil Yalçın İmanov isə deyib ki, təqsirləndirilən şəxslər vəkillərindən onların iştirakı olmadan heç bir prosesdə iştirak etməməyi tələb edirlər: “Siz müvəqqəti deyirsiniz. Biz bilmirik hansı müddətə kimi davam edəcək. Hər dəfə vəkillərdən kollegiyaya şikayət edirsiniz. Siz bir sahə müvəkkilinə irad bildirmisiniz, təsir edə bilmirsiniz, amma vəkilləri təsir altında saxlayırsınız. Elə bil başımızın üstündə Damokol qılıncıdır. Mən hər dəfə iclaslarda iştirak etmişəm. Bu gün iki dəqiqə gecikən kimi şikayət etmisiniz. Sahə  müvəkkili həmkarımı təhqir edir, siz nəsə demirsiniz, lakin bizdən şikayət edirsiniz”.

Hakim bildirib ki, sahə müvəkkili ona tabe deyil: “O hadisə vəkilə görə oldu. Birinci vəkil başladı, sonra tərəflər bir-birlərini ittiham etdilər. Mənim hərkətlərimdən şikayət etmək hüququnuz var. Lakin mən sizdən şikayət etməmişəm. Hər dəfə prosesin vaxtın elan edirik. Siz gecikəndə kollegiyaya yazırıq ki, vəkillərin iştirakı təmin edilsin. Heç vaxt sizin cəzalandırılmaq məsələniz qoyulmayıb”.

Daha sonra hakim bildirib ki, şahidlərdən Nicat Hüseynov, Mövsüm Feyzullayev, Zamin Məlikov, Zamin Bünyatov, ölən polislərin nümayəndələri İmran Nəsibov, Əlizamin Tağıyev məhkəməyə teleqram vuraraq iclasda iştirak etmək istəmədiklərini deyiblər. Hakim bildirib ki, buna görə də məhkəmə qərar qəbul edib ki, onların dindirilmələrinə ehtiyac yoxdur.

Vəkil Yalçın İmanov isə deyib ki, “Siz bildiyiniz halda ki, şahidlər haqqında gələn teleqramı onlar etməyib. Onlar gəlib ifadə verməlidirlər. Bilirik ki, şahidlərə təzyiq olur. Bundan əvvəlki şahidlər də dedi ki, onların şəxsiyyət vəsiqələri əlindən alınıb, onların adından teleqram vururlar. Burdan görünür ki, məhkəmə işi obyektiv araşdırmaq istəmir”.

Hakim vəkillər tərəfindən verilən vəsatətləri də elan edib. Bildirib ki, vəkillər Ramil Usubov, Cahangir Hacıyev və Kərim Əlimərdanovun məhkəməyə çağırılmaları barədə vəsatət veriblər.

Daha sonra iclasda vəkillərlə təqsirləndirilən şəxslərin məsləhətləşmələri üçün fasilə elan edilib.

Fasilədən sonra təqsirləndirilən şəxslər vəkillərdən imtina etdikləri üçün məhkəmə prosesi 12 dekabra təxirə salınıb. -36С-