«Rabitə işi üzrə» məhkəmə prosesi davam edib

Bakı Ağır Cinayətlər Məhkəməsində bu gün "Rabitə işi üzrə" məhkəmə prosesində "Optik Rabitə və Tikinti Quraşdırma" MMC-nin sabiq direktoru Namazəli Məmmədov ifadə verib. O, ifadəsində 1984-cü ildən rabitə sahəsində müxtəlif vaxtlarda mühəndis, rəis müavini və rəis vəzifələrində çalışdığını, 1997-ci ildən sahibkarlıqla məşğul olduğunu deyib: "Hər zaman qayda-qanunla işləmişəm. Vergi orqanları da hər il yoxlayırdı, ciddi nöqsanlarımız olmayıb. İstintaq bizə ittiham irəli sürüb ki, rəqəmləri şişirtmişik. Mənə ittiham verilib ki, 4 milyon mənimsəmişəm. Halbuki, mənim "Aztelekom"dan 16 milyon alacağım var. Vergini, digər işləri çıxanda 6 milyon yarım qalır. Yenə də mənə 2 milyon yarım borcları qalır".

N.Məmmədov ifadəsinin davamında bu günə qədər niyə həbs olunduğunu bilmədiyini deyib: "Maliyyə Nazirliyinin əməkdaşlarının məhkəməyə dəvət olunmasını istəyirəm".

Hakim N.Məmmədova bildirib ki, ona 12 milyon manat mənimsəmə ilə bağlı ittiham irəli sürülüb, 4 milyon yox.

Bundan sonra təqsirləndirilən "Azintelekom"un baş direktoru, "Rabitə Voleybol Klubu"nun prezidenti Cəlil Cəfərov ifadə verib. O, elan olunmuş ittihamla özünü təqsirli bilmədiyini, heç bir cinayət törətmədiyini bildirib: "Heç bir mütəşəkkil dəstəyə qoşulmamışam, qanuna uyğun işləmişəm. Məqsəd keyfiyyətli danışıqlar aparmaq, kibercinayətkarlıqla mübarizə aparmaq olub".

C.Cəfərov ifadəsində Rabitə Nazirliyi rəhbərliyi tərəfindən "paket" almasını etiraf edib: "Mənə əvvəldən nə pul verilibsə, onu da almışam. Bu pullar voleybol klubu üçün yaranan zəruri xərclərə görə verilib. Nazir deyəndə ki, get pulu Aparat rəhbərindən al, onda gedib Vidadi müəllimdən alırdım. Nazirliyin işçiləri, müavinləri də paket alırdı. Mənim heç bağ evim də yoxdur. Obyekt sahibi deyiləm. Kağız yeyilmir ki, belə şeylərə xərclənir".

"Biz Bakıda keçirilən beynəlxalq yarışlarda, həmçinin Avropa Oyunlarında yüksək səviyyədə işləmişik, mükafatlandırılmışıq. Biz həbs olunandan sonra "Rabitə Voleybol Klubu” da dağıldı. Azərbaycan internet üçün beynəlxalq kanalı Rusiya üzərindən alırdıq, onlar inhisar qurmuşdular, bizi kənara çıxmağa qoymurdular. Almaniyadan kanala qoşulduq və qiyməti 10 sentdən 2 sentə endirdik, xərclər 300 milyon azaldı. 2004-cü ildə Naxçıvan da blokadada idi, ora ilə danışmaq mümkün deyildi. Yalnız peyk kanalı ilə rabitə vardı. Hər ay nazirə bu barədə məruzə edirdim. İranda yüksək vəzifədə olan, vaxtilə Yaponiyada bir yerdə təhsil aldığım dostum vasitəsilə həmin ölkə ilə anlaşma əldə etdik, xüsusi tariflə rouminq açıldı və Naxçıvanla optik rabitə yaradıldı. Həmin vaxt heç "Azercell", "Bakcell" və "Nar Mobile"ın İranda rouminqi yox idi. “Azercell”in baş direktoru dəfələrlə bu işdə onlara köməklik etməyimi istəmişdi".

Fasilədən sonra "Azintelekom" MMC-in sabiq baş direktoru Cəlil Cəfərov tərəflərin suallarını cavablandırıb. Prezidenti olduğu klubun sponsoru bir başa Rabitə və Yüksək Texnologiya Nazirliyi olub: "Nazirliyin kollegiya qərarı ilə klubun xərcləri "Azintelekom" MMC-nin hesabına verilirdi. Nazirin göstərişi ilə hər ay Vidadi Zeynalovdan 50 min kluba görə alırdım. Sonradan əlavə olan data sistemə görə 29 min almışam. Vidadi Zeynalov da bunları təsdiq edə bilər. Mən burada heç kimə qarşı ittiham vermirəm. Sadəcə olan şeyləri deyirəm. Əgər mən o pulları mənimsəsəydim, mənim də evim, bağım obyektlərim olardı. Ümumiyyətlə işimdə nəsə başqa şey olsaydı mən birinci gündən bunları istintaqa deyərdim". Cəlil Cəfərov bildirib ki, dəfələrlə voleybol komandasının işindən ayrılmaq istəyib: "Bununla bağlı cənab nazirə demişdim ki, 3 dənə şöbə ver, voleybolu istəmirəm. Lakin icazə vermədi. Mən ümumiyyətlə voleybol işini yaxşı bilirdim". Təqsirləndirilən bildirib ki, “Cartburg NC” şirkəti ilə müqavilə bağlanılıb əməkdaşlıq edilməsini birbaşa mənə rabitə və yüksək texnologiyalar naziri Əli Abbasov tapşırıb. “Nazir qiymətlərə, trafikin aylıq həcminə və keyfiyyətinə də daim özü nəzarət edib. Nazir mənə trafik həcminin sürətlə aşağı düşməsinin qarşısının alınmasını, eyni zamanda kibercinayətkarlığın qarşısının alınması üçün MTN-nin böyük dəstəyi və köməkliyinin lazım olduğunu bildirib. Ona görə də "AKEY" tərkibində olan "Cartburq" MMC ilə çalışırdıq. Həmin şirkət Ayaz Kərimovun idi. Hər ay onların işçisi Elmar Hüseynov gəlirdi, pulu gətirirdi. Oradan 50 mini klub üçün, 29 mini data sistemə görə götürürdüm. Qalan 300 min dollar civarında pulu isə Vidadi Zeynalova gətirib verirdim".

Prosesdə təqsirləndirilən şəxs "Azərpoçt" MMC-nin baş direktoru olmuş Qəmbər Bəybalayev ifadə verib. O, ifadəsində bildirib ki, 20 ilə yaxın rabitə sahəsində çalışıb: "Burada oturanlar içində ən çox bu sahədə çalışan mənəm. "Azərpoçt" rəhbərliyinə gətiriləndən sonra poçt sistemi çox bərbad vəziyyətdə idi. Əli Abbasov nazir təyin olunandan sonra poçt sistemi daha da inkişaf etdi. Vidadi müəllimin də buna öz töhfəsini verirdi. O zamanlar Əli Abbasova məndən şikayət eləmişdilər, araşdırıldı, məlum oldu ki, mənim heç bir günahım olmayıb". Təqsirləndirilən şəxs "paket" sistemindən danışıb: "Əli Abbasov bizə "paket" verilməsi ilə bağlı təklif edəndə, mən buna razı olmadım. Xahiş etdim ki, maaşlarımızı qaldırın. O da mənim xahişimi yerinə yetirdi, mərkəzi aparatın maaaşını yüksəltdi. 300 manat alan mən 1300 manat almağa başladım. Mənə 74-dək  bölmə tabe idi. Onların bir nəfəri deyə bilməz ki, onlardan bir qəpik almışam. Onların özlərinə "paket" verilirdi. Bizim idarədən pullar aparılırdı. Yalnız mən heç bir zaman bu işə qarışmamışam. Mənə milyonlarla pul mənimsənildiyi deyilir. Əmlaklara baxsınlar. Qusarda çobanın 2 mərtəbəli evi var, mənim isə 1 mərtəbəli evim var. Mən fikirləşirdim ki, prokurorluq məni buraxacaq. Çünki heç vaxt mənimsəmədə iştirak etməmişəm".

İttihama münasibət bildirən Qəmbər Bəybalayev qeyd edib ki, bölgələrdə olan poçt xidmətinin bərpası üçün nazirlik və dövlət tərəfindən vəsait ayrılırdı: "Bu vəsait üzrə tender müsabiqəsi keçirilirdi. Qaliblərlə müqavilələr aparılırdı. Mən bütün işimi qanun çərcivəsində aparmışam. Mərkəzi aparatın maaşı yaxşı olub. İdarə rəislərinə isə müəyyən "paket"lər verilirdi".

Proses dekabrın 7-də davam edəcək. - 36В-