«Nardaran işi»ndə şahid işgəncələrdən danışıb – «Dözmədim, boynuma götürdüm»

“Kürdəxanı təcridxanasında “bandotdel”in şöbə müdiri Kərim Əlimərdanov və əməliyyat müvəkkili İslam Ağabəyov mənə dedi ki, üçdə birlə çıxıb uşaqlarının yanına getmək istəyirsənsə, get məhkəmədə Talehin əleyhinə ifadə ver, heç olmasa, istintaqdakı ifadəni təsdiqlədiyini de”. Razılaşmadım. Dedilər ki, “onda Əli İnsanovun gününə qalacaqsan, oradan çıxmayacaqsan”. Bu barədə noyabrın 7-də Bakı Ağır Cinayətlər Məhkəməsində “Nardaran işi” üzrə şahid qismində ifadə verən Mötəbər Babayev deyir.

2015-ci il noyabrın 26-da polisin Nardaran qəsəbəsində keçirdiyi xüsusi əməliyyatda ikisi polis olmaqla, altı nəfər öldürülüb. Rəsmi məlumatlara görə, hadisə ilə bağlı 70-dən çox adam həbs edilib. Onların əksəriyyəti yüngül ittihamlarla həbs cəzası alıb. Taleh Bağırov, Abbas Hüseynov və daha 16 nəfərin məhkəməsi isə hazırda davam edir. Onlar qətldə, daha bir çox ağır cinayətlərdə ittiham edilir. Təqsirləndirilənlər bu ittihamları rədd edir, onlar ifadələrinin işgəncə altında alındığını bildirir.

Bugünki məhkəmə iclasında şahid qismində ifadə verən Mötəbər Babayev 2015-ci il noyabrın 26-da Nardaranda keçirilən xüsusi əməliyyatdan dörd gün sonra Sabirabadda həbs edilib.

“Əvvəlcə Sabirabad Rayon Polis Şöbəsində işgəncələrə məruz qaldım. Zorlanmaqla hədələndim. Boynuma silah qoymaq istəyirdilər. Nə qədər döydülər, boynuma götürmədim. Şalvarımı aşağı çəkəndə, dözmədim, yalvarıb-yaxardım ki, bunu eləməyin. Axırda rəis müavini Əliağa Kazımov dedi ki, aparın kənddə həyətlərinə heroin qoyun, atasını götürüb gəlin buraya. Onda dedim ki, atamın 51 yaşı var, heç vaxt şöbə-filan görməyib, buraya gələn kimi ürəyi partlayar. Götürdüm boynuma. Guya, silahı Rövşən adlı adam mənə saxlamağa verib, mən də aparıb kənddə gizlətmişəm”, deyə o məhkəmədə bildirib.

Mötəbər Babayev Sabirabadda saxlandıqdan sonra Bakıya gətirilib. Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə (BMCMİ) ondan “Müsəlman Birliyi” Hərəkatının sədri Taleh Bağırovun əleyhinə ifadə vermək tələb olunub.

“Mənə dedilər ki, “sənə silahı Hacı Taleh verib. Allaha and olsun, elə işgəncələr verirdilər, insan ləyaqətinə toxunan elə hərəkətlər eləyirdilər ki, öldürsəydilər, ondan yaxşı idi. Əllərim arxadan bağlı vəziyyətdə elə yerdən vururdular ki, dözmək mümkün deyildi. Dubinka və butulka ilə məni zorlamaq istəyirdilər. Ona görə də gətirdilər, qol çəkdim”.

Onun sözlərinə görə, bu il oktyabrın 19-da BMCMİ əməkdaşları axşam saat 23 radələrində oraya gəlib onu hədələyiblər ki, istintaqda dediklərini məhkəmədə təsdiq etsin. O, məhkəmədə istintaqda işgəncə  alıtnda dediklərini məhkəmədə təsdiq etmədiyinə görə cəzalandırılacağından narahatdır.

“Dediklərinə əməl eləmədiyimə görə mənə nəsə eləyəcəklər. Ya Xələcdə (Salyan rayonunda Xələc qəsəbəsindəki cəza evi) nəsə düzüb-qoşacaqlar, ya çıxandan sonra yenə tutacaqlar. Özləri də xəbərdarlıq eləyiblər ki, “Əli İnsanovun gününə qoyacağıq səni”. Amma mən adamın üzünə durub olmayan şeyi necə deyim?”, deyə şahid ifadəsinin sonunda əlavə edib.

Vəkil Yalçın İmanov şahidin təhlükəsizliyini təmin etmək üçün müvafiq tədbirlər görülməsi barədə vəsatət qaldırıb.

Vəkil Gülşən Salmanova baş verənləri məhkəməyə qarşı hörmətsizlik kimi qiymətləndirib.

Məhkəmədə zərərçəkən kimi ifadə verən DİN Baş Mütəşəkkil Cinayətkarlıqla Mübarizə İdarəsinin əməkdaşları “Nardaran işi” üzrə həbs olunanlara işgəncə verilməsi ilə bağlı deyilənləri təkzib ediblər.

Məhkəmə prosesi davam edir. -03D-