Nardaranlılar barrikadalar qururlar

Nardaran qəsəbəsinin mərkəzində toplaşan yüzlərlə insan polisin bu yaşayış məntəqəsinə qan tökülməsinə səbəb olan bugünki aksiyasını pisləyib.

Yerli sakinlər namaz vaxtı ibadət yerinə daxil olan, atəş açan, namaz qılan şəxləri saxlayan polisin aqressivliyindən qəzəblərini və bunu anlamadıqlarını bildiriblər.

“İlk olaraq məhz polis silahsız insanlara atəş açıb, onları qorxutmağa çalışıb. İlk olaraq onlar Taleh Bağırzadənin həbsinə yol verməməyə çalışan şəxsləri öldürüblər”, deyə mitinq iştirakçılarından biri Turan-ın müxbirinə bildirib.

Aksiya iştirakçıları rəsmi məlumatlara görə sayı 14 nəfər olan həbs edilənlərin hamısının dərhal azad edilməsini tələb edirlər. “Biz saat 24-ə qədər hakimiyyətə vaxt vermişik, onları azad etməsələr etirazlar davam etdiriləcək”, deyə digər bir aksiya iştirakçısı qeyd edib.

Bu arada, qəsəbə sakinləri Nardaran girişlərində barrikadalar qurmağa, nəqliyyatı qəsəbəyə buraxmamağa başlayıblar. Barrikadalara daş və armatur yığılır. Gərginlik getdikcə artır.

Xatırladaq ki, bugünki qarşıdurmalar zamanı dörd yerli sakin və iki polis həlak olub.

Qəsəbə sakinlərinin hakimiyyətlə qarşıdurması zamanı bu, ən ciddi qurbanlardır. İlk dəfə buna bənzər hadisə 2001-ci ildə olub, amma həmin vaxt cəmi bir yerli sakin vurulub, buna baxmayaraq, yüzlərlə polis qiyamçı Nardaranı özünə tabe etməyə müvəffəq olmayıb. -02В-