Milli Şuranın sədri, professor Cəmil Həsənli:
Dostlar! Türkiyə -Suriya sərhədlərindəki təyyarə olayı ölkəmizdəki MTN rüsvayçılğını arxa plana keçirib. Amma gündəlikdən çıxarmayım. Rəsmi və ictiai qadağalara baxmayaraq gündə hansısa generalın, idarə rəisinin, poçt müdirinin həbs edilməsi, isitintaqa cəlb edilməsi haqqında məlumatlar alırıq. MTN-də baş verənlər, “dövlətçiliyin müdafiəsi” adı altında dövlətin adından həyata keçirilən qanunsuzluqlar bizim dövlət deyilən qurumumuzun hansı fəlakətlərin içində olduğunu ortaya qoydu. Amma bir həqiqət var. Biz heç ölkənin baş təhlükəsizlik orqanlarında hansı möcüzələr yaradıldığının, namuslu Azərbaycan vətəndaşlarına, əlində beş-üç manat pul olan iş adamlarına qarşı antiterror orqanlarında hansı terror metodlarının tətbiq edildiyinin yalnız 5-10 faizindən məlumatlıyiq.
Və bu 5-10 faiz özü də Azərbaycanda dövlət anlayışının hansı fəlakətin içində olduğunu qabarıq şəkildə göstərir. Bütün bunlar ölkənin siyasi rəhbərliyinin məlumatı olmadan baş verə bilməzdi. Proseslərin gedişi bunu aydın şəkildə təsdiq edir. MTN olayı ilə bağlı baş verənlər göstərdi ki, təhlükəsizlik orqanları ilə bağlı həbs və araşdırmalar ədalətin, qanunun bərpası arzusundan deyil, müəyyən korporativ maraqlaraın, şəxsi etibarlılıq limitinin bitməsi zərurətindən irəli gəlir. Bunun aydın nümunəsi jurnalist Pərviz Həşimlinin işidir. Bu işin saxtalığının bütün təfərrüatı ortada olsa da, Ali Məhkəmə lap bu yaxınlarda MTN-in çöküşündən sonra qəbul etdiyi qərarla onu həbsdə saxlamaq haqqında qərar qəbul etdi. Ya götürək elə N!DA-çı gənclərin işini. “Molotov kokteyli” və narkotikadan quraşdırılan bu saxta cinayət işinin qurbanları kimi Rəşadət, İlkin, Rəşad, Məmməd, Ömər hələ də cəzaçəkmə yerində saxlanmaqdadır. Jurnalist Rauf Mirqədorova “vətənə xəyanət” damğası vurub bu sayıqlığına görə “Vətənə xidmət” medalı alanların mahiyyəti və cinayət əməlləri cəmiyyətə bəlli olsa da Ağır cinayətlərə dair məhkəmə hələ də jurnalistin əməlində “vətənə xəyanət” məqamları araşdırır.
MTN olayı gündəmə gələndən sonra hər kəsi belə bir təbii sual düşündürür: Bəs qalan nazirliklərdə, idarə və müəssisələrdə, hüquqi mühafizə orqanlarında, bank-maliyyə orqanlarında vəziyyət necədir? Məsələn kim iddia edə bilər ki, DİN-də, Bandotdeldə, prokurorluq orqanlarında, vergidə, gömrükdə, vəziyyət MTN-də olduğundan yaxşı vəziyyətdədir? Son vaxtlar ölkənin işgüzar həyatının geniş bir dairəsinin, Beynəlxalq Bank kreditçilərinin Bandotel tərəfindən qanunsuz həbsinin nəyi MTN-nin hazırda cəmiyyətə şok xəbərlər kimi təqdim edilən əməllərindən yaxşıdır. Prokurorluq MTN-dən gələn hansı işə yox deyib, məhkəmələr MTN nəzarətində olan hansı işdə ədaləti axtarmağa səy göstərib? Harada MTN adı olubsa prokurorluğu da, məhkəməsi də həmin işləri “dövlətçiliyin qorunması” naminə növbədən və qanundankənar formada icra edilibdir. Məhkəmələri obyekt kimi işlədilən bir məmləkətdə bundan artığını gözləməyin mənası da yoxdur.
Maliyyə-iqtisadi sahədə vəziyyət heç də bundan yaxşı deyil. Hökumət öz əli ilə Beynəlxalq Bankı çökürtməklə yüzlərlə müəssisələr fəaliyyətini dayandırmalı oldu, on minlərlə insan işsizlər ordusunu artırmağa başladı. Beynəlxalq Bank süni şəkildə hakimiyyətdaxili intiriqaların nəticəsi olaraq sökdürüldü. Bankın kredit siyasəti yalnız onun rəhbərliyi tərəfindən deyil, eyni zamanda Maliyyə Nazirliyi tərəfindən müəyyən edilirdi. Onun məsuliyyətini daşımaq əvəzinə nazirlik hər şeyi Bank rəhbərliyinin üzərinə qoymaqla yaxasını kənara çəkir. Bankın əsas kredit borclusu kimi Bandotdelin diqqətindən yayınan “Akkord” şirkəti milyardı ötmüş vəsaitləri necə asanlıqla ala bilərdi? Bunun arxasında kim dayanır. Məsələn Bankın müşahidə Şurasında söz və səs sahibi olan Maliyyə nazirliyi niyə bir şirkətə milyardı ötən vəsaitin verilməsinə yox deməyib? Hazırda Bandotdeldə saxlanılan əmlakı əlindən alınan iş adamlarının hamısı birlikdə yalnız bir “Akkord” şirkəti qədər kredit almayıblar.
Adamların əmlakı, mülkiyyəti, müəssisələri gecə yarısı Bandotdelə notaris aparılmaqla “qanuni” şəkildə əllərindən alınır. Son vaxtlar Borc-kredit münasibətlərinin Bandotdel vasitəsi ilə “tənzimlənməsi” ölkənin işgüzar həyatını proflaktikası mümkünsüz olan yaralar vurdu. İçərisində Hacı Məmmədovun qanqster dəstəsini bəsləmiş DİN indi ənənəvi rəqibi olan MTN üzərində “qələbəsinin” eyforiyasın yaşayır. Halbuki, polis idarələrində vətəndaşların döyülərək öldürülməsi, şərlənməsi, qurama cinayət işləri, “dövlətçiliyin” müdfiəsi altında Bandotdelin həyata keçirdiyi cəza metodları öz mütəşəkkiliyinə görə MTN-çiləri gölgədə qoyur.
Lap bu yaxınlarda Malik Hüseynov adında bir vətəndaş borc-kredit asılılığına görə özünü od vurub yandırmalı oldu. Bu vətandaşları kütləvi kredit asılılığına düşmüş bir məmləkətin adı həyat tərzinə çevrilib. İki milyon yarım insan hazırda bankların borc asılılığına düşüb. Bunların içində vəzifəli şəxslərin rüşvət eytiyaclarını ödəmək üçün ağır kredit şərtləri altına girən insanlar da az deyil. Maliyyə nazirliyi və Mərkəzi bankın maliyyə böhranın qarşını almaq üçün aydın proqramı, düşünülmüş pul-kredit siyasəti yoxdur. Biri manatın üzməsindən, o biri onun yastıq altında mürgüləməsindən dəm vurur. Əvəzində Azərbaycan vətəndaşı günbəgün yoxsullaşır, kasıblaşır, müflisləşir. Vergi və gömrük orqanlarında insanların soyulması ənənə halını alıb. Hər nazirliyin öz istintaq orqanı var. Faktiki olaraq bu orqanlarla mübahisədə vətəndaşın, iş adamının, xırda və orta mülkiyyətçinin özünü müdafiə etmək imkanı sıfıra bərabərdir. Bu da öz növbəsində ölkənin iqtisadi, maliyyə və işgüzar həyatınını sıfırlanmaya doğru aparır.
Rəy yaz