Nefroloqlar builki «Böyrək günü»nü uşaqlara həsr edib

 Bu gün Ümumdünya Böyrək günüdür. 2006-cı ildən başlayaraq Beynəlxalq Nefrologiya  Federasiyası hər il martın 2-ci cümə axşamını böyrək xəstəlikləri günü kimi qeyd edir. Azərbaycan da daxil olmaqla, 154 ölkənin həkimləri bu aksiyaya qoşulub. Aksiyanın məqsədi  anadangəlmə və qazanılmış böyrək xəstəliklərinin profilaktikasına, vaxtında düzgün müalicəsinə diqqəti artırmaqdır. Nefroloqlar həmçinin xroniki böyrək çatışmazlığına səbəb ola bilən başqa xəstəliklərin (şəkərli diabet, arterial hipertenziya və s.) müalicəsi ilə məşğul olan mütəxəssislərlə birgə  əhali arasında təbliğat kampaniyasını gücləndirməyə çağırılar.

Dünyada 500 milyondan artıq, yəni hər 10 yetkin insandan biri böyrək xəstəliklərindən əziyyət çəkir. Hər il milyonlarla insan böyrək çatışmazlığının yaratdığı insult və infarktdan dünyasını vaxtsız dəyişir.  Federasiyanın 2016-cı il üçün Böyrək günün şüarı isə belədir:”Böyrək xəstəlikləri və uşaqlar. Qarşısını almağa tələsin!”

Bu gün Azərbaycan Tibb Universitetində böyrək xəstəlikləri ilə bağlı elmi-praktiki konfrans keçirilir. Ölkənin bütün hemodializ şöbələrinin əməkdaşları, nefroloqlar, transplantoloqlar bu konfransda iştirak edir.

Səhiyyə Nazirliyinin mətbuat xidmətindən “Turan”a verilən məlumata görə, konfransda son illərdə bu sahədəki yeniliklərlə bağlı elmi məruzələr dinləniləcək, tövsiyyələr veriləcək.

Xatırladaq ki, bu yaxınlarda  M. Cavadzadə adına Uroloji Xəstəxananın Hemodializ şöbəsinin müdiri, Hemodializ Komissiyasının üzvü Fariz Babayev “Turan”ın əməkdaşına  2016-cı il yanvarın 1-dək ölkədə  böyrək çatışmazlığından əziyyət çəkən 2842 xəstənin  qeydə alındığını bildirmişdi.  Onlardan 1138 nəfəri Bakıda, 1704 nəfəri isə regionlarda hemodializ xidməti ilə təmin olunub. Azərbaycan üzrə 34 dializ mərkəzində 534 aparat fəaliyyət göstərir. Bu dializ mərkəzlərinin 8-i Bakı şəhərində, 26-sı regionlardadır.