Neft şirkətində tənqidlə təhqiri ayıra bilmirlər

“Sahibkarlığa Dəstək” İctimai Birliyi cümə günü “Park.İNN” otelində “Şəhər yenidənqurması və mülkiyyət məsələləri” mövzusunda “dəyirmi masa” keçirib.

Tədbirdə ölkədə həm şəhərsalmanın, həm də vətəndaşların mülkiyyət hüquqlarının toxunulmazlığı məsələsinin bərbad gündə olduğu qeyd edilib. Belə ki, Bakının Baş planının olmaması üzündən hazırda şəhərdə vətəndaşların mülkiyyətlərinə qarşı qanunsuzluqlar baş verir. 

Hüquq müdafiəçisi İradə Cavadova son 5 ildə Bakının mərkəzi hissəsində vətəndaşların mənzillərinin qanunsuz olaraq əllərindən alındığını deyib. Vətəndaşlara adekvat kompensasiyanın, bəzi hallarda isə ümumiyyətlə kompensasiyanın ödənməməsinə diqqət çəkilib. Dövlət Neft Şirkətinin öncə vətəndaşlara evlərindən çıxarılmayacağı vədini verdiyini, sonra isə məhkəmə və şirkətin mühafizə  qüvvələri gücünə vətəndaşları evlərindən küçəyə atdıqları vurğulanıb.   

Tədbirə qatılan neft şirkətinin nümayəndəsi Nadir Əmiraslanov bu faktı şirkətin ünvanına təhqir kimi dəyərləndirib. Neft şirkətinin xalqın və dövlətin düşməni olmadığı bəyanatını səsləndirib. Vətəndaşları şirkətə məxsus torpaqları qanunsuz zəbt etməkdə suçlandırıb. N.Əmiraslanov terminallar və boru kəmərlərinin tikintisinin Prezident Administrasiyasının göstərişi və Nazilər Kabinetinin qərarı ilə tikdiklərini bildirib. “Bu dövlətin puludur, desələr kompensasiya verin verəcəyik, desələr verməyin, verməyəcəyik”, -N.Əmiraslanov şirkətin və rəsmi qurumların qanunsuzluqlarına haqq qazandırıb. 

Daha sonra o, şirkətin ünvanına haqlı tənqidlərə etiraz olaraq olaraq tədbiri tərk edib. 

“Azərbaycanda mülkiyyət məsələsi nə iqtisadi, nə də hüquqi məsələdir, bu, siyasi məsələdir”, - iqtisadçı ekspert Natiq Cəfərli mülkiyyət toxunulmazlığı sahəsindəki qanunsuzluqlara rəy verib. Hazırkı iqtidarın xalqın səsilə hakimiyyətə gəlmədiyi üçün xalqı eşitmədiyi deyilib. Burada problemlərin kökünün qanunvericilikdə yox, məhz siyasi idarəetmədə olduğu xüsusü vurğulanıb. 

Şəhərsalma və Arxitektura Komitəsinin əməkdaşı Tofiq Quliyevə görə, hazırkı “mülkiyyət xaosu” Bakının Baş planının olmaması ilə bağlıdır.  Bu plan, eləcə də Böyük Bakı Baş planı, regional planlar hüquqi qüvvə alanda bu hərc-mərcliyə son qoyulacağı nəzərə çatdırılıb. Amma natiq bu planların nə vaxt qəbul ediləcəyi barədə konkret vaxt söyləməyib. 

İqtisadçı Rəşad İbrahimov qeyd edib ki, mülkiyyətə qəsd təkcə vətəndaşın mənzilinin əlindən alınması ilə yekunlaşmır. O, sahibkarlara məxsus obyektlərin sökülməsinə diqqəti çəkib. Bununla yanaşı Bakıda “divar qaşımaları”nın vətəndaşların sağlamlığına ciddi zərər vurduğu qeyd olunub.-05S-