NİDA fəalı iğtişaşlar hazırlamaq ittihamını təkzib edib

Yanvarın 8-də Ağır Cinayətlərə dair İşlər üzrə Bakı Məhkəməsində NİDA hərəkatının 7 fəalının və “Azad gənclik” təşkilatının işi üzrə prosesdə təqsirləndirilən şəxs Rəşadət Axundovun ifadəsi oxunub.

O özü ifadə verməkdən imtina edib. Hakim onun ibtidai istintaqa verdiyi iki ifadəni oxuyub, bu ifadələrdə Axundov ona qarşı irəli sürülmüş ittihamları təkzib edib.

Vəkil Rəşid Hacılının Turan-a verdiyi məlumata görə, Axundov irəli sürülmüş ittihamların onunla və digər müttəhimlərlə heç bir əlaqəsi olmadığını bildirib. O deyib ki, ittihamlar saxtadır və istintaq dəlil təqdim etməyib.

İstintaqın 10 mart etiraz aksiyasının hazırlanması ilə bağlı “Venesiya” kafesində müzakirələr aparılması haqqında sualına cavabda o, belə bir görüşün olmadığını deyib.

“Kafe şəhərin mərkəzində yerləşir və hər yerdə videomüşahidə kameraları var. “Venesiya”da heç vaxt görüş olmayıb. Qoy istintaq videokameralardan görüntülər təqdim etsin”, deyə Axundov qeyd edib.

O, həmçinin bildirib ki, NİDA dinc yolla siyasi mübarizənin tərəfdarıdır və heç vaxt iğtişaş planlaşdırmayıb.

Proses yanvarın 9-da davam edəcək. Xatırladaq ki. gənclər martın 10-da Bakıda Fəvvarələr Meydanında etiraz aksiyası zamanı kütləvi iğtişaşlar hazırlamaqda ittiham olunurlar. Onlara qarşı həmçinin qanunsuz partlayıcı maddə, narkotik saxlamaq, habelə xuliqanlıq ittihamları irəli sürülüb. -16B06-