Prokurorluq: Rafiq Tağının qatillərini MTN və DİN axtaracaq (YENİLƏNİB)

Baş Prokurorluq publisist Rafiq Tağının qətli üzrə təhqiqatın dayandırılması haqqında məlumatla bağlı şərh verib.

Qurumun mətbuat xidmətinin rəhbəri Eldar Sultanovun sözlərinə görə, “ibtidai istintaq zamanı bütün zəruri və təxirəsalınmaz prosessual istintaq hərəkətləri yerinə yetirilib”. Lakin “təqsirləndirilən şəxs qismində cəlb edilməli olan şəxsin müəyyən edilməməsi ilə əlaqədar iş üzrə icraat dayandırılıb”.

Bu şəxsin müəyyən edilməsi üçün MTN və DİN-ə əməliyyat tapşırıqları göndərilib. Həmin qurumlar tərəfindən əməliyyat-axtarış tədbirləri həyata keçirilib, deyə Sultanov bildirib. -16/06D-

2014 Yanvar 08 (Çərşənbə) 15:38:45

Yazıçı-publisist Rafiq Tağının qətli ilə bağlı başlanmış cinayət işi üzrə icraat dayandırılıb. Bu barədə Turan-a mərhumun vəkili Elçin Sadıqov bildirib.

Müstəntiq vəkilə təhqiqatın dayandırılması haqqında yazılı şəkildə məlumat verib. Bu zaman qeyd edilir ki, bu qərardan şikayət verilə bilər.

Sadıqov cinayət işinin dayandırılmasının səbəblərini aydınlaşdırmaq üçün müstəntiq Nadir Mirzəyevə müraciət edib. Sonuncu deyib ki, işin dayandırılması 53.1.1-ci maddə (cinayətin törədilməsində təqsirli olan şəxslərin müəyyən edilməsinin mümkün olmaması) ilə əlaqədar dayandırılıb.

Vəkil qeyd edib ki, faktiki olaraq istintaq aparılmayıb. Müdafiə tərəfi iki dəfə istintaqın hərəkətsizliyindən məhkəməyə müraciət edib. Lakin müraciətlər qəbul edilməyib. İndi istintaq orqanından məhkəməyə şikayət veriləcək, deyə o bildirib.

Mərhumun qardaşı Alim Tağıyev Turan-ın müxbiri ilə söhbətində qeyd edib ki, yazıçının doğmalarına işin icraatının dayandırılması haqqında rəsmi məktub daxil olmayıb. Ailə rəsmi sənəd aldıqdan sonra öz münasibətini bildirəcək, deyə o bildirib.

Xatırladaq ki, 2011-ci il noyabrın 19-da axşam saatlarında naməlum şəxslər Rafiq Tağıya hücum edib. Ona çoxsaylı bıçaq xəsarətləri yetirilib. Cərrahi əməliyyatdan sonra Tağının vəziyyəti yaxşılaşıb, lakin noyabrın 23-də onun vəziyyəti pisləşib və xəstəxanada dünyasını dəyişib.

Faktla bağlı Cinayət Məcəlləsinin 126.1-ci (qəsdəm sağlamlığa ağır zərər vurma) maddəsi ilə cinayət işi başlanıb, lakin Rafiq Tağının ölümündən dərhal sonra Cinayət Məcəlləsinin 120.1-ci (qəsdən adam öldürmə) maddəsinə tövsif olunub.

Bir müddət əvvəl Media Hüquqları İnstitutu bəyanat yayaraq, hökumətə müraciət edərək, jurnalistlərə qarşı basqılara yol verənlərin cəzasız qalması təcrübəsinə son qoyulmasını təmin etməyə, publisist-yazar Rafiq Tağının, “Monitor” jurnalının baş redaktoru Elmar Hüseynovun qatillərinin tapılaraq məsuliyyətə cəlb olunması yönündə səylərini təxirəsalmadan artırmağa, jurnalistlərə, mediaya qarşı bütün zorakılıq, təhdid, hədələmə, qanunsuz saxlama hallarını əsaslı şəkildə tədqiq edib günahkarları məsuliyyətə cəlb etməyə çağırıb. -16B06-