Noyabrda Yuxarı Qarabağda hava yaxşı olacaq

Bakı/02.11.20/Turan: Noyabr ayında havanın orta aylıq temperaturu iqlim normasına yaxın, bəzi yerlərdə bir qədər çox olacaq. Aylıq yağıntının miqdarı iqlim normasına yaxın, bəzi ərazilərdə normadan bir qədər çox olacaq. Bu barədə Ekologiya və Təbii Sərvətlər Nazirliynin Milli Hidrometeorologiya Xidmətinin məlumatında deyilir.

Milli Hidrometeorologiya Xidməti bildirir ki, noyabrın birinci ongünlüyünün birinci yarısında hava şəraitinin əksər rayonlarda əsasən yağmursuz keçəcəyi, lakin dağlıq rayonlarda yağış yağacağı gözlənilir.

Bakıda və Abşeron yarımadasında orta aylıq temperatur 11-13 dərəcə isti olacaq, bu da iqlim normasına yaxın və bir qədər çoxdur. Gecələr havanın temperaturu 7-12, ayın əvvəlində 16 dərəcəyədək, gündüzlər 18-23, ikinci və üçüncü ongünlüyün bəzi günlərində 14-16 dərəcə isti olacaq. Aylıq yağıntının miqdarı iqlim normasına yaxın (norma 28-38 mm.) olacaq.

Hazırda döyüşlərin getdiyi Yuxarı Qarabağda, - Xankəndi, Şuşa, Xocalı, Xocavənd, Qubadlı, Zəngilan, Laçın, Kəlbəcər, Daşkəsən, Gədəbəy rayonlarında orta aylıq temperatur 4-7 dərəcə isti  olacaq, bu da iqlim norması daxilindədir. Gecələr havanın temperaturu 2-7 dərəcə isti, ikinci və üçüncü  ongünlüyün bəzi günlərində 0-4 dərəcə şaxta, gündüzlər 10-15, ikinci və üçüncü ongünlüyün bəzi günlərində 2-7 dərəcə isti olacaq.  Aylıq yağıntının miqdarının iqlim normasına yaxın  (norma 27-34 mm) olacaq. -03-