Nurəddin Məmmədli müxalifətin mitinqində terror aktının hazırlanması versiyasını ağlabatan saymır

Bakı/26.10.17/Turan: "Əgər Dövlət Təhlükəsizlik Xidmətinin (DTX) əməkdaşları Demokratik Qüvvələrin Milli Şurasının 28 oktyabr mitinqində törədilməsi planlaşdırılan terror aktının təşkilatçılarını məhv etməklə bu cinayətin qarşısını alıbsa ona alqış düşür", - Milli Şuranın Koordinasiya Mərkəzinin üzvü, Azərbaycan Xalq Cəbhəsi Partiyası Ali Məclisinin sədri Nurəddin Məmmədli bildirib.

Amma N.Məmmədli bununla bağlı digər mülahizələrin də olduğunu deyir və kimlərinsə mitinqdə terror aktı törətmək istəməsi versiyasını ağlabatan saymır.

"Burada məqsəd mitinqdə terror ola bilməsi adı ilə insanların şüuruna qorxu yeritmək də ola bilər, hətta kimlərinsə Milli Şuranın əleyhinə olduğunu və hətta terrordan belə çəkinməmələrini göstərmək də ola bilər", - N.Məmmədli vurğulayıb.

Ötən gün DTX Lökbatan qəsəbəsində keçirilən xüsusi əməliyyat zamanı terror təşkilatlarından birilə əlaqəsi olan üç nəfərin məhv edildiyini bildirib. Qrup oktyabrın 28-də Bakıda müxalifətin mitinqində terror aktı törətməyi planlaşdırırmış.06D-