«Nyu-York tayms» Azərbaycanda seçkiöncəsi kampaniyaya qoşulub

Məqalənin müəllifi Peter Sadovnik yazısında “Nehrəmli İbrahim” kimi tanınan iş adamı İbrahim İbrahimovun (Diasporla İş üzrə Dövlət Komitəsinin sədri Nazim İbrahimovun qardaşı) “yuxuda gördüyü layihəni” nümunə gətirib. “Avesta” konserni rəhbərinin salfet kağızında çəkdiyi “cənnəti” Zaha Hədidin başçılığı ilə memarlar kollektivi 2020-25-ci illərdə həyata keçirəcək. Publisist bildirir ki, 136 mənzil artıq $300 mindən satılıb. 

Təbliğat materialında yüngül kinayə var, amma beynəlxalq ictimai rəyin sərtliyinə eyham belə yoxdur. Redaksiyanın (çətin ki) və ya Nehrəmli İbrahimin hesabına Bakıda və Abşeronda olan müəllifə görə, bizim ölkə yaddır. Onu maraqlandırmır ki, niyə hakim ailənin təyin etdiyi biznesmenin Bakıdakı “Rolls Roys”u qara, Dubaydakı qırmızıdır, naməlum mənşəli maliyyə sahibi olan biznesmenin bu qədər hökmranlığı hardandır (H.Əliyev adına hava limanında əcnəbi jurnalisti İbrahimovun çağırdığını biləndə bütün pesonal çaxnaşıb). Biznesmen Fransa və Türkiyəni sevir, amma salfet üzərində layihələri təyyarədə Bakıya uçanda çəkir.

Əgər amerikalı biznesmen jurnalistlərə desəydi ki, salfet kağızında gələcəyin layihəsini çəkib və memarlar onu ura ilə işləməyə başlayıblar, okeanın o tayındakı mətbuat bu adamı dəli adlandırardı. Amma Potomakdan minlərlə kilometr uzaqdakı “möcüzə göstərən” belə bir şeyi rəva görüb. 

ABŞ-a müsəlman şərqində regionda energetika xabı olmaq istəyən, İranın acığına “Avroviziya” keçirən, İsraillə bütün prinsipial məsələlərdə əməkdaşlıq edən, NATO-nun hərbi gücləri ilə planetin narahat nöqtələrində növbə çəkən müttəfiq lazımdır. Amma bu meqa şıltaqlıq və Əliyevlər ailəsinin başqa bahalı həngamələrindən Azərbaycan xalqına nə fayda? 

Regionlarda, məsələn, Quba və İsmayıllıda sosial problemlər həll edilmədiyi bir vaxtda Xəzər dənizində minlərlə mənzil, 8 otel, cıdır meydanı, yaxt klub, aeroport, kilometrdən hündür göydələn olan 55 süni adadan ibarət arxipelaq ölkəyə lazımdırmı? Hakimiyyət əyalətdən əhalini gətirib Bakıya yığmaqla nəyə nail olmaq istəyir?  İbrahimovun sözlərinə görə, $100 qiyməti olan layihəni Rusiya, İsrail, ərəb ölkələri və Çin biznesmenləri maliyyələşdirəcək və adalarda milyona yaxın insan yaşayacaq. 

Yeni tarixdə Azərbaycan (azərbaycanlılardan fərqli olaraq) müstəqil şəkildə heç nəyə nail olmayıb – səhiyyə, təhsil, texnoloji fikir dünya inkişafından uzaqdır, real iqtisadiyyat yoxdur, əhali idxal malı geyinir, əsasən xaricdən gətirilən ərzağı yeyir. Yüzlərlə yerli alim, həkim, politoloq, sosioloq planetin aparıcı tədqiqat mərkəzlərində çalışır, amma bunda Bakı ali məktəblərinin xidməti varmı? 

Azərbaycan gənc dövlətdir, ona məhkəmlənmək lazımdır. Amma bu, bazar alverçiləri kimi qışqırıqla, oğurluq pullarla lovğalanaraq yox, əsaslı şəkildə edilməlidir. --17D—