Ombudsmanın nümayəndəsi həbsdə olan fəalın bədənində zorakılıq izlərini «görməyib»

Kürdəxanı təcridxanasında saxlanılan NİDA fəalı Elgiz Qəhrəmanın bədənində zorakılıq izləri hələ də qalır. Bu barədə Turan-a onun vəkili Fariz Namazlı avqustun 26-da E.Qəhrəmana baş çəkdikdən sonra bildirib.

Fəal vəkilə deyib ki, bir həftə ərzində iki dəfə ombudsman aparatının nümayəndələri həkimlə birlikdə onun yanına gəliblər. Birinci görüşdə E.Qəhrəman DİN Baş Mütəşəkkil Cinayətkarlığa Qarşı Mübarizə İdarəsində ona verilən işgəncələr barədə danışıb.

Lakin ombudsman aparatı mətbuat üçün bəyanatda E.Qəhrəmanın bədənində zorakılıq əlamətlərinin olmadığını bildirib. Bu, vəkil Nemət Kərimli tərəfindən təkzib edilib.

Bundan sonra avqustun 25-də ombudsman aparatının nümayəndələri yenidən E.Qəhrəmana baş çəkiblər.

“Elgizin sözlərinə görə, ikinci görüş zamanı ombudsmanın nümayəndələri bildiriblər ki, onun bədənində zorakılıq izləri yoxdur, nə üçün o, işgəncələr barədə danışır?

Elgiz cavab verib ki, zorakılıq izləri artıq keçib, ona işgəncə veriblər, təhqir ediblər, qeyri-insani rəftar ediblər. Bunun araşdırılması üçün zorakılıq izlərinin qalması vacib deyil”, - vəkil deyib.

Vəkilin sözlərinə görə, E.Qəhrəmanın qarnında hələ də qızartı var.

Ombudsman nümayəndələrinin birinci gəlişi zamanı Elgiz bu qızartıları həkimə göstərib. Lakin həkim deyib ki, bu, antisanitariyanın nəticəsidir. Ancaq onun ayaqlarında da qızartılar olub.

Bundan əlavə, E.Qəhrəman başından aldığı

dəyənək zərbələri nəticəsində ağrılardan şikayətlənib, ancaq həkim onun başını müayinə etməyib.

E.Qəhrəmanın sözlərinə görə, onu elə bərk döyüblər ki, huşunu itirib.

Eyni zamanda Elgizə doğmaları ilə görüşə icazə verilməyib. Ancaq həftədə iki dəfə telefon edə bilər.

Müdafiə tərəfi həbs qətimkan tədbirinin ev həbsilə əvəzlənməsi üçün vəsatət hazırlayır.

E.Qəhrəman avqustun 12-də saxlanılıb və həmin gün CM-in 234.4.3-cü maddəsi (külli miqdarda narkotik maddənin qanunsuz dövriyyəsi) ilə həbs olunub. Onu 12 ilədək azadlıqdan məhrumolunma təhlükəsi gözləyir.

E.Qəhrəmanovu bir həftə DİN BMCQMİ-də saxlayıblar və  vəkili yanına buraxmayblar.

NİDA Hərəkatı E.Qəhrəmanın siyasi motivlərlə həbs olunduğunu bəyan edib.—06D—