Faiq Əmirovun həbsindən şikayət verilib

“Azadlıq” qəzetinin maliyyə direktoru Faiq Əmirovun həbs qərarından apellyasiya şikayəti verilib. Bu barədə “Azadlıq” qəzeti məlumat yayıb. Bu gündərdə şikayətə baxılacaq.

F.Əmirov avqustun 20-də saxlanılıb. Avqustun 22-də Nəsimi Rayon Məhkəməsi onun barəsində 3 ay müddətinə həbs qətimkan tədbiri seçib.

Baş Prokurorluğun Ağır Cinayətlər üzrə İstintaq İdarəsi F.Əmirova qarşı 168.1 (dini ayinlərin icrası adı altında vətəndaşların hüquqlarına qəsd) və 283.2.2-ci maddələr (öz vəzifə xidmətindən istifadə etməklə milli, irqi və ya dini ədavətn salınması) ilə cinayət işi qaldırıb.

İstintaq bildirir ki, F.Əmirovdan türkiyəli din xadimi Fətullah Gülənə aidiyyatı olan ədəbiyyat və disklər götürülüb. Bundan əlavə, istintaqın məlumatına görə, guya F.Əmirov Gülənin rəhbərlik etdiyi “Hizmət” Hərəkatının üzvüdür.

Müdafiə tərəfi ittihamları uydurma və siyasi motivli sayır. Vəkilin sözlərinə görə, kitablar və disklər F.Əmirovun avtomobilinə o saxlandıqdan sonra qoyulub. Digər tərəfdən, bu kitablar Azərbaycanda qadağan edilməyib.

“Sərhədsiz reportyorlar” təşkilatı F.Əmirovun həbsini pisləyərək onun azad edilməsinə çağırıb.—06D--