Övladlığa götürmə elektron qaydada həyata keçiriləcək?

Bakı/13.11.18/Turan: Əmək və Əhalinin Sosial Müdafiəsi Nazirliyi mərkəzləşmiş elektron informasiya sistemi çərçivəsində "Valideynlik himayəsindən məhrum olmuş uşaqlar və övladlığa götürmə" alt sisteminin yaradılması üzərində iş getdiyini bildirib. Sistemin işə salınması təxmin edilən tarix 1 iyul 2019-cu ildir.

İdarədə izah ediblər ki, alt sistem valideyn himayəsindən məhrum olmuş və övladlığa götürülmüş uşaqların, övladlığa uşaq götürmək istəyən şəxslərin elektron uçotunu aparmağa imkan verəcək.

Sistem həmçinin övladlığa götürmə sahəsində digər xidmətlərin göstərilməsi üçün tətbiq ediləcək. Nazirlik əlavə olaraq dekabrın 10-da prezidentin qəbul etdiyi "Övladlığa götürmə sahəsində idarəetmənin təkmilləşdirilməsi üzrə əlavə tədbirlər haqqında" fərmanı xatırladır.

Qeyd etmək yerinə düşərdi ki, prezidentin fərmanı və Əmək və Əhalinin Sosial Müdafiəsi Nazirliyinin qərarı Turan-da 4 dekabr 2018-ci il tarixli "10 il ərzində övladlığa uşaq götürməyə görə rüşvət 2 dəfə artıb" sərlövhəli məqalədən sonra verilib.

Məqalədə mətbuatdan götürülmüş materiallar əsasında Azərbaycanda övladlığa götürməyə görə rüşvətin məbləğinin manatın məzənnəsi və inflyasiya ilə birlikdə fasiləsis olaraq artdığı bildirilirdi. 2008-ci ildə Uşaqları Müdafiə Liqasının sədri Yusif Bəkirov növbədənkənar övladlığa götürməyə görə 6-7 min dollar rüşvət alındığını bildirirdi. Bu il Azərbaycanda uşağın "qiyməti" 20 min manat və ya təxminən 12 min dollardır. 10 il ərzində rüşvət məbləği iki dəfə artıb.

Prezidentin fərmanı və nazirliyin qərarı övladlığa götürmədə cinayətkar sxemlərin aradan qaldırılmasına yönəlib. Amma bəzi digər nazirliklərdə elektron xidmətlərin tətbiqi göstərir ki, xidmətlərin elektronlaşdırılması korrupsiyaya qarşı mübarizəyə heç də həmişə kömək etmir.

Statistikaya gəlincə, Azərbaycanda övladlığa götürmələrin sayı artır. Belə ki, 2017-ci ildə ölkədə 877 uşaq övladlığa götürülüb, bu, 2016-cı ilin göstəricisindən 13,5% çoxdur, xəbəri AR Dövlət Statistika Komitəsi verir. -0-