Partiya sədrinin məhkəməsi başlayıb

Bakı/10.01.18/Turan: Bu gün, yanvarın 10-u məhkəmə Azərbaycan Karlar Cəmiyyətinin həbsdəki sədr müavini, eləcə də Azərbaycan Vahid Kommunist Partiyasının (AVKP) rəhbəri Musa Tukanovu azadlığa buraxmayıb.

Bunu onun oğlu Akif Tukanov bildirib.

Onun bildirdiyinə görə, Bakı Ağır Cinayətlər Məhkəməsində Musa Tukanovun işi üzrə məhkəmə prosesi başlayıb.

İlk məhkəmə iclasında tərəflər işin məhkəmə baxışına verilməsinə etiraz etməyiblər. M.Tulkanovun müdafiə tərəfi məhkəməyə bir neçə vəsatət təqdim edib. Vəkilləri M.Tulkanovun xəstə, müharibə veteranı, əlil olmasını əsas gətirərək onun barəsində seçilmiş həbs-qətimkan tədbirinin dəyişdirilməsini xahiş ediblər.

Ancaq hakim Samir Əliyevin sədrlik etdiyi məhkəmə kollegiyası vəsatəti rədd edib.

Proses yanvarın 17-də davam etdiriləcək.

Musa Tukanov Karlar Cəmiyyətinin sədr müavini, Azərbaycan Vahid Kommunist Partiyasının (AVKP) rəhbəridir. O, ötən həftə saxlanıb. Binəqədi Rayon Məhkəməsi Cinayət Məcəlləsinin 311-ci (rüşvət alma) maddəsi ilə ittiham olunan M.Tukanov barəsində həbs-qətimkan tədbiri seçib.

Azərbaycan Vahid Kommunist Partiyası 1993-cü ildə Səyyad Səyyadovun rəhbərliyi ilə təsis edilib. Sonradan partiya iki yerə parçalanıb. Onlardan birinə M.Tukanov rəhbərlik edib. Ancaq partiyanın dövlət qeydiyyatı olmayıb.-0-