Azərbaycan 120 ölkəyə təhsil qrantı verəcək

Bakı/10.01.18/Turan: Qoşulmama Hərəkatına üzv dövlətlərin Azərbaycanın ali təhsil müəssisələrində təhsil alan vətəndaşlarına Azərbaycan hökuməti qrantların verəcək.

Yanvarın 10-da Azərbaycan prezidenti Ilham Əliyev bununla bağlı sərəncam imzalayıb.

Sərəncamın məqsədi Qoşulmama Hərəkatına üzv dövlətlərin vətəndaşlarının Azərbaycanın ali təhsil müəssisələrində təhsilinə dəstək verməkdir.

Səndə əsasən 2018-ci ildən başlayaraq Qoşulmama Hərəkatına üzv dövlətlərinin vətəndaşları üçün hazırlıq kurslarında və ali təhsilin bakalavriat, magistratura, doktorantura, tibb təhsili üzrə əsas təhsil və rezidentura səviyyələrində təhsil qrantı proqramı təsis ediləcək.

Təhsil qrantlarının say həddinin hər il 20 nəfər olmaqla, 5 il ərzində 100 nəfərə çatdırılması nəzərdə tutulur.

Təhsil qrantları dövlət hesabına ödənilən təhsil haqqı, viza, qeydiyyat, yataqxana və ya mənzil kirayəsi, gündəlik qidalanma, tədris ədəbiyyatı ilə təminat, nəqliyyatdan istifadə, kommunal xidmətlər, tibbi yardım və ildə bir dəfə ölkələrinə gediş-gəliş xərclərini əhatə edəcək.

Sərəncamın icrası Nazirlər Kabinetinə, xarici işlər, təhsil, ədliyyə, maliyyə nazirliklərinə həvalə edilib.

Qoşulmama Hərəkatı hərbi ittifaqlara qoşulmayan dövlətlər tərəfindən 1961-ci ildə Belqradda təsis edilib. Dövlətlərin ərazi bütövlüyü, suverenliyi və siyasi müstəqilliyinə hörmət, daxili işlərinə qarışmama Hərəkatın əsas prinsipləridir.

Son 25 il ərzində Hərəkata üzv dövlətlərin sayı 99-dan 120-yə yüksəlib. Azərbaycan Qoşulmama Hərəkatına 2011-ci ildə üzv olub.-0-

Bu ilin aprelində Qoşulmama Hərəkatı Xarici İşlər Nazirlərinin toplantısı Bakıda keçiriləcək.

Azərbaycan 2019-2022-ci ildə Qoşulmama Hərəkatına ev sahibliyi edəcək. Hərəkatın Sammiti də 2019-cu ildə Azərbaycanda keçiriləcək.