Penitensiar Xidmət Leyla Yunusun döyülmədiyini bildirir

Penitensiar Xidmət Bakı İstintaq Təcridxanasında hüquq müdafiəçisi Leyla Yunusun döyülməsi barədə məlumatı təkzib edib.

Xidmətin rəis köməkçisi Yaşar İsakov bu xəbərləri “tamamilə əsassız” adlandırıb.

  “Həqiqəti əks etdirməyən və ictimai fikrin çaşdırılmasına yönəldilən bu cür xəbərlərə son qoymaq məqsədilə Penitensiar Xidmətin rəhbərliyi müvafiq hüquq-mühafizə orqanlarına araşdırma aparılması barədə müraciət edib. Bundan ötrü  təcridxananın dəhlizlərində quraşdırılmış videokameralar tərəfindən qeydə alınan görüntülər prokurorluq orqanına təqdim olunacaq”, - Y.İsakov bildirib.

O, təcridxananın əməkdaşı Fəqan Yaqubovun L.Yunusu döyməsini inkar edib.

   “F.Yaqubov, eləcə də Penitensiar Xidmətin digər əməkdaşları məhkum və təqsirləndirilən şəxslərlə davranış qaydalarını bilir və onlara tam riayət edirlər”, - o virğulayıb.

İsti su olmadığından L.Yunusun soyuq su ilə çimərək xəstələnməsi barədə onun vəkillərinin bəyanatına gəlincə, Y.İsakov qeyd edb ki, qadınların saxlandığı korpusda həftədə 3 dəfə 4 saat isti su verilir.  L.Yunus saat 10:00-dan 14:00-dək isti su ilə təmin olunub.

L.Yunusa tibbi yardımın göstərilməməsi barədə məlumat da təkzib olunur.

Bildirilir ki, sentyabrın 19-dan 24-dək L.Yunus beş dəfə həkim nəzarətində olub və bu, qeydiyyat jurnalında təsdiqlənib. Həkimlər onun hərarətinin qalxmasını “təsdiqləməyiblər”.

L.Yunusun kamerasında axtarışın aparılmasına gəlincə, Penitensiar Xidmətin məlumatına görə, həmin gün başqa kameralarda da axtarış aparlıb.-16D-