Pərviz Həşimli MTN-in istintaq təcridxanasında aclıq aksiyasına başlayıb

MTN-in istintaq təcridxanasında saxlanılan Pərviz Həşimli hüquqlarının pozulmasına etiraz əlaməti olaraq aprelin 15-dən aclıq aksiyasına başlayıb. Bu barədə Turan-a onun vəkili Elçin Sadıqov bildirib.

O, bu gün Həşimliyə baş çəkib.

Jurnalist vəkilə bildirib ki, məhkəmədə dünənki çıxışında MTN istintaq təcridxanasında saxlanma şəraitindən və döyüldüyündən şikayət etdiyinə görə ona yenə təzyiq göstərilib. Xüsusən, Həşimlini karserə salmaqla hədələyiblər.

Həşimli bir həftə əvvəl doğmaları ilə görüşməyə icazə verilməsini və ya telefonla danışmaq imkanı yaradılmasını tələb edib, amma heç bir cavab almayıb.

Aprelin 15-də səhər jurnalist yenidən bunu tələb edib. “Buna görə Pərviz bu gündən etibarən istintaq təcridxanasının rəhbərliyinə məlumat verərək, doğmaları ilə görüş tələbi ilə aclıq aksiyasına başlayıb”, deyə Sadıqov bildirib.

Onun sözlərinə görə, jurnalist özünü pis hiss edir. Bundan başqa, onun dişi ağrıyır və dişinə plomb vurulmalıdır. Lakin istintaq təcridxanasında dişə plomb vurmadıqlarını, yalnız dişi çıxardıqlarını bildiriblər.

 “Bizim yol” qəzetinin əməkdaşı, moderator.az saytının rəhbəri Pərviz Həşimli 17 sentyabr 2013-cü ildə MTN əməkdaşları tərəfindən həbs edilib. Martda həbs müddəti üç ay uzadılıb. O, 206.3.2 (qaçaqmalçılıq) və 228.2.1-ci (qanunsuz silah əldə etmə və saxlama) maddələrlə ittiham olunur. Jurnalist özünü təqsirli bilmir, istintaqda ondan guya müxalifəti maliyyələşdirən bir sıra vəzifəli şəxslərə qarşı ifadə alındığını bəyan edir. Ondan həmçinin AXCP lideri Əli Kərimliyə qarşı ifadə verməyi tələb ediblər. -16B04-