Pərviz Həşimliyə təzyiqlər davam etdirilir

Jurnalist və hüquq müdafiəçisi Pərviz Həşimlinin istintaqı gecikdirilir, ona qarşı fiziki və mənəvi təzyiqlər davam etdirilir, Mili Təhlükəsizlik Nazirliyinin istintaq təcridxanasından Ədliyyə Nazirliyinin təcridxanasına köçürülmür. Ona qarşı irəli sürülən ittihamlar sifarişdir. Bu gün RATİ-nin Mətbuat Mərkəzində jurnalist Pərviz Həşimlinin ailə üzvləri və AXCP sədri Əli Kərimli mətbuat konfransında səslənən başlıca fikirlər bunlardır. 

Pərviz Həşimli sentyabrın 17-də Milli Təhlükəsizlik Nazirliyi tərəfindən saxlanılıb. Ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma) maddələri üzrə ittiham irəli sürülüb və barəsində Səbayel rayon məhkəməsi tərəfindən 2 aylıq həbs-qətimkan tədbiri seçilib. Noyabrın 7-də həbs qətimkan tədbirinin müddəti daha 3 ay uzadılıb.

Pərviz Həşimli ittihamları qəbul etmir, hüquq müdafiəçiliyi və jurnalist fəaliyyətinə görə saxta ittihamla həbs edildiyini bəyan edir.

Amnesty İnternational beynəlxalq hüquq müdafiə təşkilatı Pərviz Həşimlini “vicdan məhbusu” kimi tanıyıb.

Jurnalistin atası Kamran Həşimli bildirib ki, MTN-də oğluna qarşı təzyiqlər davam etdirilir. O, oğluna qarşı işgəncələrlə bağlı ölkə rəhbərlərinə, ombudsmana, Qafqaz Müsəlmanları İdarəsinin sədrinə müraciət edib. Amma işgəncələr indi də davam etdirilir. 

“Necə olur ki, Qafqaz Müsəlmanları İdarəsinin sədri erməni katolikosunun xahişi ilə erməni əsirlərinin saxlanma vəziyyəti ilə maraqlanır, onlara baş çəkir, hətta əsirlərə kabab verildiyini deyir. Amma, Azərbaycan vətəndaşının xahişi ilə ölkənin tanınmış jurnalistinin işgəncəyə məruz qalması barədə müraciətinə cavab vermir, gedib onun saxlanma vəziyyəti ilə maraqlanmır?”,  deyə ata sual edib.  

O, oğlunun sorğu-suala başına torba keçirlərək aparıldığını, sorğu-sual zamanı qara torbanın başından çıxarılmadığını, sorğu-sualların birində təhqir edildiyini bildirib.  

“Pərvizi elə vəziyyətə gətiriblər ki, sorğu-sual zamanı qayçını götürərək özünə qəsd etmək istəyib. Mən buradan Pərvizi təhqir edənlərə deyirəm, gedin öz ailənizin namusunu çəkin, bəs  edər. Biz kasıblarla işiniz yoxdur”, deyə Kamran Həşimli qeyd edib. 

Pərviz Həşimli hakimiyyətdaxili qruplaşmalar arasında mübarizənin qurbanına çevrilib. Belə ki, onu istintaqda məcbur edirlər ki, yüksək vəzifəli şəxslərdən AXCP sədri Əli Kərimliyə pul çatdırdığını yazsın.  “Pərviz belə bir iş görməyib, qurana da and içib”, deyə o qeyd edib.  

Kamran Həşimli deyib ki, istintaqın soruşduğu adamlar Heydər Əliyevə də, İlham Əliyevə də canla-başla qulluq edib. “Onları nə qədər məcbur etsən belə, nəinki müxalifətə, heç kasıba da bir qəpik verməz”, deyə o bildirib, 

AXCP sədri Əli Kərimli bildirib ki, MTN insanları şərlədib həbs etməklə məşğuldur. Onun fikrincə, MTN-in istintaq təcridxanası ləğv edilməlidir. O, Azərbaycan hakimiyyətini cinayətlərdən əl çəkməyə çağırıb. 

“Siz onsuz da etdiyiniz cinayətlərə görə cavab verəcəksiniz. Heç olmasa yarı yoldan çəkilin. Türklər demişkən, “qorxunun əcələ faydası yoxdur”. Dəyişikliklər başlayıb, siz də özünüzü xilas edə bilməyəcəksiniz”, deyə o, hökumətə müraciət edib. 

Kərimli istehza ilə deyib ki, iqtidarın ona qarşı nifrəti çox böyükdür. Onun fikrincə, hökumətdə kimin nə etdiyi hamıya məlumdur. Kimi lazımdırsa vəzifədən çıxarın. 

“Bunların mənə qarşı nifrəti o qədər böyükdür ki, hətta nazirlərini də mənə görə cəzalandırırlar. İlham Əliyev  nazirlərinin ona deyil, mənə işlədiyini güman edir. Bu, narahatçılığın yüksək həddidir ”, deyə o qeyd edib. -03C-