Polis elektroşokerdən istifadə hüququ qazandı

Bakı/28.10.14/Turan:  Bundan sonra polis işçilərinin lazım olduğu halda elektroşokerlərdən istifadə etməsinə icazə veriləcək. Bu qərar çərşənbə axşamı Milli Məclisdə  qəbul edilib. Belə ki, parlamentdə  “Polis haqqında” qanuna dəyişikliklər qəbul olunub.

Parlament komitəsinin rəhbəri Əli Hüseynli bildirib ki, polislərin elektroşokerdən istifadə etməsi “Polis haqqında” qanunun 26-cı maddəsinə edilən dəyişiklikdən sonra mümkün olacaq.

“Bu maddə polislərin isifadə etdikləri xüsusi vasitələrə həsr olunub. Bura elektroşokerlərin xüsusi vasitələr sırasına daxiı edilməsi haqda 3-1 bəndinin əlavə edilməsi nəzərdə tutulur. Bu elektroşokerlərdən cinayət törədənlərə qarşı istifadə olunacaq”, - Ə.Hüseynli bildirib.

Ondan hücumların və zorakılığın digər növlərinin qarşısının alınması, qiyam və kütləvi iğtişaşlar zamanı asayişin bərpası, həmçinin yaşayış binasını zəbt etmiş bir qrup şəxsin zərərsizləşdirilməsi zamanı istifadə olunacaq.

O həmçinin qeyd edib ki, elektroşokerlər bütün polislərin sərəncamında olmayacaq, yalnız müəyyən vəzifəli şəxslərdə olacaq ki, onların siyahısı daxili işlər naziri tərəfindən təsdiqlənəcək.

Müzakirılərdən sonra “Polis haqqında” qanuna dəyişiklik qəbul edilib.

Qeyd edək ki, indiyədək polisin sevimli aləti dəyənək idi. Elektroşokerlərin nə qədər effektiv və populyar olacağını zaman göstərəcək.-02D-