Polis Polad Aslanovun xanımının təkbaşına aksiyasının qarşısını alıb

Bakı/08.04.22/Turan: Həbsdə olan jurnalist Polad Aslanovun xanımı Gülmirə Aslanova aprelin 8-də Prezident Administrasiyasının qarşısında etiraz aksiyası keçirib. O 1 saylı koloniyada həyat yoldaşının döyülməsinə etiraz edib və onun təhlükəsizliyinin təmin olunmasını tələb edib.

Ötən həftə o, koloniyada həyat yoldaşına baş çəkib və onun üzərində zorakılıq izlərini görüb. Məlum olub ki, Poladı kamera yoldaşı döyüb. Aslanovanın sözlərinə görə, o, həbsxana administrasiyası ilə əməkdaşlıq edir.

Aprelin 4-də o, Penitensiar xidm'tin  qarşısında etiraz aksiyası keçirib, həyat yoldaşının təhlükəsizliyinin təmin olunmasını tələb edib.

“Heç bir tədbir görülməyib. Bu məhbus karserə salınıb, bu gün  cərimə kamerasından çıxıb və yenidən Poladla eyni otaqda yerləşdirilıb. Mən həyat yoldaşımın təhlükəsizliyini və onun azadlığa buraxılmasını tələb edirəm”,- Aslanova deyib və aksiya zamanı “İşgəncə vermə, azad et!” şüarını qaldırıb. Lakin polis plakatı onun əlindən alıb.

Aslanova prezidentin hüquq-mühafizə orqanlarına kuratorluq edən köməkçisi ilə görüş tələb edib. Lakin ona Prezident Administrasiyasının vətəndaşların qəbulu Mərkəzinə getməyi təklif ediblər və  prezidentin köməkçisi Fuad Ələsgərovun onu qəbul edəcəyini vəd ediblər.

Qadın polislər Aslanovanı zorla Prezident Administrasiyasından çıxarıblar.

Vətəndaşların qəbulu Mərkəzində də Fuad Ələsgərov Aslanovanı qəbul etməyib.

“Məni artıq Ələsgərovun şöbəsinin əməkdaşları qəbul ediblər və bunun da nəticəsi olmayıb. Ona görə də mən imtina etdim", -  Aslanova deyib.

Xatırladaq ki, Xeberman.com saytının təsisçisi və redaktoru Polad Aslanov 2019-cu ilin iyununda dövlətə xəyanətdə ittiham olunaraq 16 il müddətinə azadlıqdan məhrum edilib. Hüquq müdafiəçiləri onu siyasi məhbus kimi tanıyıblar. Fevralın 24-də Ali Məhkəmə onun həbs müddətini 13 ilə qədər azaldıb.- 06B21-