Polis «Sovetski» sakinlərinin mitinqinə mane olub

Polis və DİN-in çevik polsi alayı bazar günü keçmiş Sovetski küçəsi və ətraf məhəllələrdə yaşayan sakinlərin etiraz aksiyası keçirməsinə mane olub.

Aksiya evlərə görə verilən kompensasiyanın həcmindən narazılıqla bağlı keçirilməli idi. Sosial şəbəkələr vasitəsilə elan edilmişdi ki, mitinq saat 14.00-də N 173 məktəbin önündə keçiriləcək. Amma öncədən məktəbin ərazisi polis tərəfindən mühasirəyə alınmışdı. Bundan başqa, ərazidə çevik polsi alayı əməkdaşları ilə dolu 10-a yaxın avtobus və bir o qədər post-patrul xidməti avtomobili vardl.

Məktəbin qarşısında toplaşmağa çalışanları polis yaxın küçələrə sıxışdırıb. Bir nəfər saxlanılıb.  

Dar küçələrə sıxışdırılan vətəndaşlar bildiriblər ki, ədalətli kompensasiya alana qədər mübarizə aparacaqlar. Onlar həmçinin martın 3-də aksiya zamanı həbs edilənlərin azad olunmasını tələb edirlər.

Yerli sakinlər, xüsusən kiçik mənzil sahibləri hesab edir ki, onlara təklif edilən 1 m2 üçün 1500 manat kompensasiya ilə şəhər hüdudlarında ev almaq olmaz.

Bu yaxınlarda baş nazirin müavini Abid Şərifov bu kateqoriyaya kompensasiya verilməsinə xüsusi qaydada baxılacağını deyib.  Hakimiyyət bəyan edir ki, kompensasiya ilə razı olmayanların evi zorla sökülməyəcək.  Amma vətəndaşlar məmurlara inanmır.–0--