AXCP-nin gənc fəalı Türkel Əlisoy Xətai polisində işgəncələrə məruz qaldığını bildirir

Azərbaycan Xalq Cəbhəsi Partiyasının (AXCP) gənc fəalı,  20 sutkalığa həbs olunmuş Türkel Əlisoy saxlandıqdan sonra Xətai polisində işgəncələrə və qeyri-insani rəftara məruz qalıb. Bu barədə gənc fəal Binəqədi təcridxanasından AXCP Gənclər Komitəsinə ünvanladığı müraciətdə bildirib.

Müraciətin mətni AXCP Gənclər Komitəsinin Facebook səhifəsində yerləşdirilib.

Fəalın sözlərinə görə, martın 5-də mobil telefonla ona bir qız zəng edərək özünü bundan əvvəl 20 sutka həbs olunmuş Bəhruz Həsənlinin rəfiqəsi kimi təqdim edib. Qız T.Əlisoydan xahiş edib ki, təcridxanaya B.Həsənliyə bəzi əşyaları aparsın.

T.Əlisoy “Xaqani” Ticarət Mərkəzinin yaxınlığında qızı gözləyərkən hüquq-mühafizə orqanlarının dörd əməkdaşı onu saxlayıb Xətai Rayon Polis İdarəsinə aparıblar.

Orada onu döyərək “polisə işləməsini” tələb ediblər. Sonra Xətai Rayon Polis İdarəsinin 35-ci bölməsinə aparıblar.

Orada rəis Cavid Usubov göstəriş verdi ki, məni stula qandallasınlar. Mənim əllərimi və ayaqlarını stula bağladılar. Rəis tapşırdı ki, məni 14 saat belə vəziyyətdə saxlasınlar, yemək, siqaret  verməsinlər. Səhər isə dedilər ki, polisə müqavimət göstərdiyim barədə yazım”, - T.Əlisoy bildirib.

 O, protokolu imzalamaqdan imtina etdikdə onun qarşısında seçim qoyublar: ya qanunsuz narkotik maddə saxlamaqda ittiham olunacaq ki, bu da cəza ilə nətcələnəcək, ya da polisə polisə tabe olmadığını etiraf edəcək və inzibati cəza alacaq.

Gənc polisə tabe olmadığı barədə sənədi imzalamağa məcbur olub.

Sonra onu yenidən döyərək Elnur Məcidlinin (AXCP fəalı, keçmiş “vicdan məhbusu”) həbsinə “yardım göstərməsini” tələb ediblər. Lakin o imtina etdiyinə görə təkrar döyülüb.

T.Əlisoyun sözlərinə görə, polisdə həmçinin ona bildiriblər ki,  əvvəllər kirayədə qaldığı mənzilin sahibindən şikayət var. Ev sahibi şikayətlənib ki, guya T.Əlisoy mənzildən pul oğurlayılb, kirayə haqqını ödəməyib.

AXCP hesab edir ki, T.Əlisoy siyasi motivlərlə təqib olunur və onun həbsi fevralın 26-da Xocalı soyqırımı qurbanlarının memorialının yanında keçirilən yürüşdə iştirak etməsilə bağlıdır. Bu yürüşlə əlaqədar AXCP-nin daha 5 fəalı həbs olunub.

Hələlik DİN mətbuat xidmətindən şərh almaq mümkün olmayıb.—06D--