Prezidentin göstərişi ilə tikinti şirkətinə cinayət işi açılıb

“Yasamal rayonu, Mətbuat prospektindəki "Ovçular evi" ərazisində yaşayış binasının tikintisi dayandırılıb. Buna səbəb tikinti aparan şirkət tərəfindən ərazidəki 54 ağacın qanunsuz olaraq kəsilməsi və ərazidəki yaşıllığın tamamilə məhv edilməsidir”.

Bu haqda prezidentin mətbuat xidmətinin məlumatında bildirilir.

Məlumatda vurğulanır ki, tikinti prezidentin göstərişi ilə dayandırılıb.

Mətbuat xidməti qeyd edir ki, tikinti ərazisindəki məlumat lövhəsində “Böyük Plaza” yaşayış və ticarət mərkəzinin inşası nəzərdə tutulub, amma tikinti şirkəti qanunvericiliyi pozaraq ərazidəki ağacları qanunsuz olaraq ağır texnika ilə məhv edib.

“Məsələ ətraf binalarda yaşayan sakinlərin ciddi narazılığına səbəb olub. Ərazidə aparılan tikinti zamanı yol verilmiş qanunsuzluqlar və ağacların kəsilməsinə ölkə prezidenti kəskin reaksiya göstərib, tikinti işlərinin dərhal dayandırılması və məsələnin nəzarətə götürülərək araşdırılması barədə göstəriş verib”, məlumatda deyilir.

Əraziyə Ekologiya və Təbii Sərvətlər Nazirliyinin baxış keçirdiyi, tikinti şirkətinin ağacların məhv edilməsinə görə, 130 min manat məbləğində cərimələndiyi, fakt üzə cinayət işi açıldığı bildirilir.

Mətbuat xidməti ölkə başçısının Nazirlər Kabinetinin 2014-cü ilin aprelində keçirilmiş iclasında ağacların kəsilməsi ilə bağlı ifadələrindən də sitat gətirib. Həmin iclasda ölkə başçısı deyib ki, ağacların kəsilməsi həm ictimaiyyəti, həm də onu narahat edir.

“Buna yol vermək olmaz. Hesab edirəm ki, biz burada daha da ciddi məsuliyyət tətbiq etməliyik. Ağackəsmə tam şəkildə dayandırılmalıdır. Ancaq nadir hallarda, o da Ekologiya və Təbii Sərvətlər Nazirliyinin rəyi ilə haradasa ağac ya köçürülə, ya kəsilə bilər”, ölkə başçısı qeyd edir.

“Gecə vaxtı gəlirlər, qanunsuz olaraq ağacları kəsirlər, yerləri düzəldirlər ki, ev tiksinlər. Bu, vicdansızlıqdır, bu, biabırçılıqdır, bu, cinayətdir”, deyə əlavə edən ölkə başçısı ağacları kəsənlərə qarşı daha da ciddi tədbirlər görülməli olduğunu ifadə edib.

Ancaq qeyd etmək lazımdır ki, 2015-16-cı illərdə Azersun Holdinq şirkətlər qrupunun Zıx şossesində yerləşən “Arzular adası” yaşayış kompleksinə daxil oln bəzi obyektlərin açılışında prezident şəxsən iştirak edib. Kompleks qırılan zeytunluğun yerində inşa edilib. Və zeytun ağaclarının məhv edilməsi davam edir.

Zıx şossesində yerləşən “Arzular adası”​