Prokuror Əmək və Əhalinin Sosial Müdafiəsi Nazirliyinin keçmiş aparat rəhbərinə 11 il həbs istəyib

Bakı/03.03.22/Turan: Martın 2-də Bakı Ağır Cinayətlər Məhkəməsində dövlət ittihamçısı Əmək və Əhalinin Sosial Müdafiəsi Nazirliyinin keçmiş aparat rəhbəri Əjdər Cəbiyevə (şair kimi Əjdər Ol təxəllüsü ilə tanınıb-red.) 11 il həbs istəyib. Əjdər Cəbiyev yarım milyon manatdan çox yeyintidə və rüşvət almaqda ittiham olunur.

Prokuror bildirib ki, Cəbiyev dövlətə dəymiş ziyanı ödəyib, bu yüngülləşdirici hal hesab edilməlidir.

Əjdər Cəbiyev 2021-ci ilin fevralında həbs edilib. Ondan öncə fevralın 4-də əmək və əhalinin sosial müdafiəsi naziri Səlim Müslümov həbs edilib.

Dövlət Təhlükəsizliyi Xidmətinin məlumatında deyilir ki, Səlim Müslümov Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə təqsirləndirilən şəxs qismində məsuliyyətə cəlb olunaraq barəsində məhkəmənin qərarı ilə həbs-qətimkan tədbiri seçilib.

Əjdər Cəbiyevin barəsində  cinayət işi 2021-ci ilin dekabrında Səlim Müslümovun işindən ayrılaraq məhkəməyə göndərilib.

Səlim Müslümovun cinayət işi üzrə istintaq davam edir.-03-