Prokuror �Gəncə işi� üzrə mühakimə olunan növbəti qrupun cəzasının yumşaldılmasını təklif edib

Bakı/09.08.19/Turan: Dövlət ittihamçısı "Gəncə işi" üzrə mühakimə olunan 8 nəfərdən ibarət digər qrupun cəzasının yumşaldılmasını təklif edib.

Avqustun 8-də Apellyasiya Məhkəməsində keçirilən prosesdə prokuror Ceyhun Əliyev 7 nəfərin barəsində ittihamın CM-nin 220.1-ci maddəsindən (kütləvi iğtişaşların təşkili) 29.220.1-ci (kütləvi iğtişaşlarda iştiraka cəhd) maddəyə tövsif olunmasını istəyib.

Yalnız Sumqayıt Dövlət Universitetinin müəllimi Elman Quliyevə qarşı ittihamın olduğu kimi saxlanmasını təklif edib. Bununla belə, prokuror məhkəmədən E.Quliyevin cəzasının 8 ildən 7 ilədək azaldılmasını xahiş edib.

Prokuror 6 il müddətinə həbs edilmiş Səbuhi Rəcəbov, Riyad Nuruzadə, Sabir Əzizov və Fikrət Mirzəliyevə cəzasının yarım il azaldılmasını istəyib.

5 il müddətinə həbs edilmiş Cabir Əzizov və Gülmirzə Nuruzadənin cəza müddətinin 4,5 ilə endirilməsi istənilib.

Lakin vəkillər prokurorla razılaşmayıblar. Onların fikrincə, müttəhimlər heç bir cinayət əməli törətməyiblər. Müdafiə tərəfi hamının barəsində bəraət hökmünün çıxarılmasını istəyib.

S.Əzizovun vəkili məhkəmədən xahiş edib ki, mütəhimin ailəsinin vəziyyətinin ağır olduğunu nəzərə alsın.

"Sabir Əzizovu radikal dini qrupun üzvü hesab edirlər. Halbuki, tutulanda içkili vəziyyətdə olub. Onun atası birinci qrup əlildir, ana 180 manata xadimə işləyir. Evə çörək gətirən iki oğul vardı, onları da tutublar. İnsanlıq xatirinə, heç olmasa, birini buraxın, evi dolandıran olsun", - vəkil bildirib.

Müdafiə tərəfi bildirib ki, dövlət başçısına Gəncə hadisələri ilə bağlı düzgün məlumat verilməyib. İş üzrə həbs olunanlara işgəncə verirlər, əziyyət edirlər, iğtişaşların təşkilini etiraf etməyə məcbur edirlər.

Proses avqustun 23-də davam edəcək. Müttəhimlər son sözlə çıxış edəcəklər.

Xatırladaq ki, bundan öncə prokuror Gəncə hadisələri üzrə mühakimə olunan iki qrupun (18 nəfər) cəzasının yumşaldılmasını istəmişdi.

*2018-ci il iyulun 3-də Gəncədə şəhərin o zamankı icra başçısı Elmar Vəliyevə qarşı sui-qəsd törədilib. Əslən Gəncədən olan Yunis Səfərov onu və onun cangüdənini yaralayıb.

Bundan sonra sosial şəbəkələrdə iyulun 10-na Gəncə administrasiyasının binası qarşısında E.Vəliyevin işinə etiraz olaraq aksiya təyin edilib. Həmin gün DİN Gəncədə iğtişaşlar barədə məlumat yayıb. Hadisələr zamanı iki polis əməkdaşı öldürülüb. Bunun ardınca dindarlar və digər şəxslər arasında kütləvi həbslər baş verib.

2019-cu il iyulun 31-də baş prokuror Zakir Zaralov bu qurumda keçirilən müşavirədə bildirib ki, E.Vəlyevə sui-qəsdlə bağlı mütəşəkkil cinayətkar qrupun 29 üzvü cinayət məsuliyyətinə cəlb edilib, 11 nəfərin barəsində isə axtarış elan edilib.

10 iyul hadisələri ilə bağlı istintaq işi başa çatıb və 60 nəfərin barəsində 8 cinayət işi məhkəmələrə göndərilib. Müttəhimlər müxtəlif müddətə azadlıqdan məhrum ediliblər. -06D-