Prokuror Rüfət Səfərovun 10 il müddətinə azadlıqdan məhrum edilməsini istəyir (YENİLƏNİB)

Rüfət Səfərovun işi üzrə prosesdə günün ikinci yarısında hakim qalan şahidləri dinləmədən gözlənilmədən məhkəmə istintaqının başa çatdığını elan edib. O, dərhal dövlət ittihamçısına söz verib. Prokuror Səfərovun 10 il müddətinə azadlıqdan məhrum edilməsini istəyib.

Növbəti iclas sentyabrın 8-nə təyin edilib.

Səfərov məhkəmənin hərəkətlərini prosessual normaların pozulması kimi qiymətləndirib.

“Bizə hətta son sözə hazırlaşmaq üçün vaxt verməyiblər. Bu, işin sifarişli olduğunu göstərir”, deyə Səfərov Turan-ın müxbirinə bildirib. -0-

2016 Sentyabr 07 (Çərşənbə) 14:29:11

Çərşənbə günü Lənkəranda Zərdab Rayon Prokurorluğunun keçmiş müstəntiqi Rüfət Səfərovun işi üzrə məhkəmə davam edib. O, rüşvət almaqda ittiham olunur.

Bu gün iki şahid dinlənilib.

Vəkil Bəhruz Bayramov Turan-a bildirib ki, şahid Babək Hacıyev ibtidai istintaq zamanı verdiyi ifadələri təsdiqləməyib.

Şahid heyvandarlıqla məşğul olur və ona vaksin verməyən baytardan prokurora şikayət edib. R.Səfərov əsas olmadığına görə bu fakt üzrə cinayət işinə başlamayıb. Sonradan heyvandar  Baş Prokurorluq yanında Korrupsiyaya Qarşı Mübarizə İdarəsinə müraciət edib və orada da cinayət işi başlamayıb.

Cinayət materiallarına görə, R.Səfərov guya B.Hacıyevi çağırıb və ona deyib ki, baytardan 500 manat alıb və pulun bir hissəsini heyvandara verəcək ki, o, öz şikayətini geri götürsün.

Lakin məhkəmə zamanı B.Hacıyev bildirib ki, Baş Prokurorluqda müstəntiq ona hazır mətn verib və o, bunu oxumadan imzalayıb. Heyvandarın sözlərinə görə, R.Səfərov onu,  ümumiyyətlə, çağırmayıb və Baytarlıq Xidmətinin rəisinə 500 manat verilməsi barədə heç bir söhbət olmayıb.

Digər şahid Şaiq Əliyev də Baytarlıq İdarəsində çalışır. O bildirib ki, cinayət işinin qaldırılmaması üçün onun rəisinin R.Səfərova rüşvət verməsi barədə “eşidib”. Proses davam edir.

Xatırladaq ki, R.Səfərov palamentin keçmiş deputatı, hakim Yeni Azərbaycan Partiyasının təsisçilərindən biri Eldar Sabiroğlunun oğludur. E.Sabiroğlu ötən il Prezident Administrasiyasının rəhbəri Ramiz Mehdiyevin ünvanına sərt çıxışlar edib.

Dekabrda R.Səfərov qanunçuluğu pozmasına və hüquq-mühafizə orqanlarının pis işinə görə hakimiyyəti açıq tənqid edib. O, prokurorluq orqanlarından çıxdığını bildirib. Öz növbəsində prokurorluq bəyan edib ki,  R.Səfərov “prokurorluq işçisinə yaraşmayan hərəkətə” görə çıxarılıb.

Yanvarın 15-də R.Səfərov rüşvət almaq ittihamı ilə həbs olunub. Lakin yanvarın 22-də o, ev həbsinə buraxılıb. R.Səfərov ittihamı rədd edib və cinayət işinin siyasi sifariş olduğunu bildirib.—06b—