Qamət Süleymaov: Təxribat təhlükəsi həmişə var

“Jurnalistlər Ekstremal Şəraitdə” (JEŞ) ictimai birliyi “Dini icmaların cəmiyyətə inteqrasiyası və dini radikalizmin aradan qaldırılması yolları” layihəsi çərçivəsində növbəti tədbir keçirib.

Bu dəfə dini fəaliyyəti məhdudlaşdırılan “Əbu-Bəkr” məscidi dini icmasının imam-camaatı Hacı Qamət Süleymanov dəyərləndirib. Onun fikrincə, ölkədə dini durumu müsbət dəyərləndirmək olar. Əvvəlki illər kimi dindarların geniş həcmli həbsləri yoxdur. Amma mövcud durumla kifayətlənmək olmaz.

Q.Süleymanov Yaxın Şərq ölkələrində baş verən hadisələr fonunda əldə edilən nəticələrə arxayınlaşmağı məqbul saymayıb. Onun fikrincə, dini maarifləndirmə əhatəsi genişlənməlidir. Ona görə, telekanallarda bu maarifləndirmə işinə geniş yer verilməlidir. Q.Süleymanov dini təbliğatı ictimaiyyətin sözünə etibar etdiyi din xadimlərinin aparmasını şərt sayıb.

Onun firkincə, belə bir təcrübənin tətbiqi xeyir verə bilər. Q.Süleymanov bunu da deyib ki, gənclərin din adı altında fəaliyyət göstərən radikal qrupların tərkibinə qoşulması özü də dini maarifsizlikdən doğan məsələdir. O, din adı altında fəaliyyət göstərən radikal cərəyanların başçılarının özlərini “yollarını azanlar” adlandırıb.

Daha bir məsələ kimi Q.Süleymanov ailələrin övladlarını daim nəzarətdə saxlamalarının vacibliyini göstərib. Ona görə, ailələr övladları namaz qılır, oruc tutur, məscidə gedir deyə sakit olmamalı, həm də övladlarının hansı məscidə getməsi, hansı qrup adamlarla oturub-durması kimi məsələləri nəzarətdə saxlamasını tövsiyə edib.

Son vaxtlar əhli-sünnə daxilindən daha çox adamın radikal ekstremist qrupların tərkibinə daxil odluqlarını deyən Q.Süleymanov bunu həmin qruplaşmaların başçılarının əhli-sünnədən olması ilə əlaqələndirib. Amma bu qruplaşmaların tərkibinin həç də yekcins olmadığını, müxtəlif məzhəb və təriqətlərdən olanların burada cəmləşdirdiklərini nəzərə çatdırıb. Bu qruplaşmalar daxilində müsəlmanların bir-birini qırmasını Q.Süleymanov əsl cahiliyyə nümunəsi adlandırıb.

Onun fikrincə, islam dünyasında baş verən bu qanlı hadisələr dini məsələ yox, siyasi məsələdir, bu qruplaşmalar hansısa qüvvələrin əlində “siyasi alətə” döndəriliblər. Q.Süleymanov bu gün saf islamın təbliğinə ciddi ehtiyac yarandığını deyib.

Hökuməti sayıqlığa çağıran Q.Süleymanov təxribatın həmişə gözlənildiyini deyərək, dini durumu ciddi nəzarətdə saxlamağa səsləyib. Yaxın Şərq hadisələrinə toxunan, 2008-ci ildə özünün terrora məruz qaldığını xatırladan Q.Süleymanov belə hadisələrin davam edə biləcəyi xəbərdarlığı edib. -05C-