Qar yağması Bakı aeroportunun işinə təsir etməyib (YENİLƏNİB)

Qarlı hava şəraitinə baxmayaraq, Bakı Beynəlxalq Hava Limanında təyyarələrin qəbulu və yola salınması ilə bağlı problem yoxdur. Bu barədə Turan-a aeroportdan bildirilib.  hava şəraiti aviareyslərin həyata keçirilməsinə təsir etməyib.

Eyni zamanda Türkiyə KİV-i bildirib ki, Turkish airlines üzrə bugünkü reys qar yağması ilə əlaqədar təxirə salınıb.-16D-

* * *

Ekologiya və Təbii Sərvətlər Nazirliyinin  Hidrometeorologiya Departamenti ölkə ərazisində müşahidə olunan qeyri- sabit hava şəraiti haqqında məlumat yayıb.

Məlumata görə, dekabrın 11-i  axşamdan 12-i səhərədək hava şəraiti qeyri-sabit olub, əksər rayonlarda yağış, sulu qar, qar yağıb, bəzi yerlərdə intensiv olub.

Qar örtüyünün hündürlüyü Bakıda 6, Rvarudda (Lerik) 40, Altıağacda 29, Gədəbəydə 25, Yardımlıda 23,  Xınalıqda 21, Lerikdə 20, Daşkəsəndə 19, Göygöldə 16, Kəlvəzdə 14, Sarıbaşda 13,  Ağdərədə 12, Naxçıvanda 11, Şərurda 9, Şamaxıda 7, Şahbuzda 5,  Mərəzədə 4, İsmayıllıda 3, İmişli, Lənkəran, Göyçayda 2, Cəfərxan, Biləsuvar, Kişçay (Şəki), Zərdab, Qəbələ,  Xaçmazda 1, Quba-Qusar zonasında 20-32 sm.-ə çatıb.

Şimal-qərb küləyinin sürəti Neftçalada 20, Abşeron yarımadasında və Abşeron dəniz rayonunda 19-23, bəzi yerlərdə 25 m/s-dək güclənib, Neft Daşları stansiyasının məlumatına əsasən dalğanın hündürlüyü 3.6 metr təşkil edib. -16d-

* * *

Yol polisi əlverişsiz, qarlı hava şəraiti ilə əlaqədar sürücüləri diqqətli olmağa çağırıb.

Yol polisinin ictimaiyyətlə əlaqələr şöbəsinin rəhbəri Vaqif Əsədov sürücüləri sürəti azaltmağa, əyləci zəif  və təmizləyici şüşəsi nasaz olan avtomobillərdən istifadə etməməyə çağırıb.

Həmçinin polis ehtiyac olmadığı halda avtomobildən istifadə etməməyə, ictimai nəqliyyatdan istifadəyə çağırıb.-16D-

2013 Dekabr 12 (Çərşənbə) 10:55:26

Dekabrın 12-nə keçən gecə Bakıda və Abşeronda qar  yağıb. Yağıntı  davam edir və gün ərzində davam edəcək. Bu barədə sinoptiklər bildiriblər.

Paytaxtda havanın temperaturu sıfır dərəcəyə enib, güclü şimal-qərb küləyi əsir.

Qar yağması əsasən şəhər ətrafında və dağlıq hissədə nəqliyyatın hərəkətini çətinləşdirib.

Ölkə regionlarında analoji hava şəraiti olacaq: qar yağacaq, külək əsəcək, temperatur aşağı olacaq. Mərkəzi rayonlarda gündüz sıfır dərəcə, gecə mənfi 5 dərəyəcədək olacaq. Dağ və dağətəyi rayonlarda intensiv qar yağacaq,  gündüz 5-6 dərəcə, gecə mənfi 13 dərəcəyədək şaxta olacaq. Yollar buz bağlayacaq. -02D-