Qarabağda iki nəfər Azərbaycanın xeyrinə casusluğa görə həbs olunub

Dağlıq Qarabağda iki gənc – Rafael Avakyan və David Barseqyan Azərbaycanın xeyrinə casusluq etdiklərinə görə uzun müddətə azadlıqdan məhrum olunublar. Bu barədə “Azadlıq” radiosunun Ermənistan xidməti məlumat yayıb.

22 yaşlı hərbçi R.Avakyan və tələbə D.Barseqyan müvafiq olaraq 11 və 10 il müddətinə həbs olunublar. 

İttihamnaməyə görə, Avakyan və Barseqyan bir il öncə “Odnoklassniki” saytında İstanbulda yaşayan Samvel Azatyan adlı bir nəfərlə tanış olublar. O, özünü bu şəhərdə fəaliyyət göstərən xeyriyyə təşkilatının üzvü kimi təqdim edib və Avakyandan müdafiə ordusu, fövqəladə hallar zamanı həlak olanlar və yaralananlar, tibbi xidmət, qidalanma, tikililərin vəziyyəti haqda və digər məlumatlar istəyib.

Məlumata görə, Avakyan hədiyyə kimi qol saatı, pul qabı və digər əşyalar, həmçinin 1000 dollara yaxın pul alıb. Azatyanın məsləhəti ilə Avakyan həmin məbləğdən 800 dollara özünə telefon alıb, 200 dolları isə dostu Barseqyana verib. Barseqyan bunun əvəzində Suriya ermənilərinin fotolarını göndərməliymiş.

Müttəhimlər özlərini müqəssir saymayıblar və bildiriblər ki, öz hərəkətlərinin gerçək məqsədini başa düşməyiblər. Avakyanın və Barseqyanın vəkili Arkadi İsraelyan hökmü ədalətsiz sayaraq deyib ki, müttəhimlər elə biliblər ki,  xeyriyyəçi  ilə ünsiyyət yarardıblar. İttiham tərəfi və məhkəmə müttəhimlərin virtual həmsohbətinin şəxsiyyətini müəyyən edə bilməyiblər.

Bundan əvvəl Ermənistanın təhlükəsizlik orqanları bildiriblər ki, Samvel Azatyan adı ilə Azərbaycanın kəşfiyyat orqanlarının nümayəndəsi fəaliyyət göstərib. 

Bundan öncə Ermənistan Silahlı Qvvələrinin qadın hərbçisi də həmin ittihamla həbs olunub. Onun məhkəməsi davam edir.-02D-