«Qəbələ» FK öz uğurunu jurnalistin ölümünə bağlılığı olan futbolçuya həsr edir

Əgər “Qəbələ” FK iki görüşün nəticəsinə görə qalib olarsa və Avropa Liqasının pley-off mərhələsinə çıxarsa bu uğur jurnalist Rasim Əliyevin  ölümünə bağlılğına görə 4 il azadlıqdan məhrum edilən futbolçu Cavid Hüseynova həsr olunacaq.

“Qəbələ” FK-nın prezidenti Taleh Heydərov (FHN rəhbəri Kəmaləddin Heydərovun oğlu) “Lill” ilə 1:1 hesabı ilə başa çatan oyunun yekunlarından razı qaldığını bildirib.

“Heç-heçə oynamaq bizə sərf edirdi. Fransanın belə klubuna qarşı heç-heçə oynamaq pis göstərici deyil. Qarşıya qoyduğumuz vəzifə ən yaxşı nəticəyə nail olmaqdır. Əgər bu raundu keçsək uğuru bizim kapitan Cavid Hüseynova həsr edəcəyik”, - azerisport.az T.Heydərovun sözlərindən sitat gətirib.

Komandanın baş məşqçisi Roman Qriqorçuk isə artıq “Lill” ilə heç-heçəni C.Hüseynova həsr edib.

“Bu, bizim üçün tarixi nəticədir. Bu uğuru hazırda bizimlə olmayan Cavid Hüseynova həsr edirik. Biz özümüzə inanırıq, bizdən asılı olan hər şeyi edəcəyik”, -  haqqin.az Qriqorçukdan sitat gətirib.

“Qəbələ” komandasının rəhbərlərinin belə davranışı ən azı təəccüb doğurur.

Onlar komandanın uğurunu jurnalistin ölümünə bağlılığı olan şəxsə həsr edirlər. Düzdür, C.Hüseynov cinayətin təşkilatçısı kimi məsuliyyətə cəlb olunmasa da ona məlum cinayəti xəbər verməməyə görə cəlb edilib.

Bir məqam diqqəti çəkir. Bir qrup şəxs tərəfindən amansızcasına döyülən jurnalistin ölümü ictimaiyyət arasında narazılıq doğurduqdan və prezident İlham Əliyev bunu pislədikdən sonra “Qəbələ” FK bəyanatla çıxış edərək istintaq başa çatana qədər C.Hüseynovun klubun əsas heyətindən kənarlaşdırıldığını bildirib.

Belə çıxır ki, əslində C.Hüseynov kənarlaşdırılmayıb, çünki “Qəbələ” FK-nın prezidenti və baş məşqçisi onu “bizim kapitan” adlandırır və demək ki, ictimaiyyət aldadılıb. Çünki istintaq C.Hüseynovun xeyrinə başa çatmayıb.

Rasim Əliyev 2015-ci il avqustun 8-də döyülüb və ertəsi gün xəstəxanada vəfat edib. Onun ölüm işi üzrə 6 nəfər, o cümlədən futbolçu Cavid Hüseynov keçir. C.Hüeynovun işi ayrıca icraata götürülərək Səbayel Rayon Məhkəməsində baxılıb. Mayın 31-də Səbayel Rayon Məhkəməsi C.Hüseynovu CM-in 307.1. (hazırlanmaqda olan cinayət barədə məlumat verməmək) və 307.2. (cinayətin gizlədilməsi) maddələri ilə ittiham edərək 4 il azadlıqdan məhrum edib.

  Digər beş nəfər R.Əliyevin döyülməsində günahkar bilinərək uzunmüddətli həbs cəzası alıb.

Jurnalistin döyülərək ölməsinə onun C.Hüseynov haqqında tənqidi status yazması səbəb olub.—06D--