Qənimət Zahidoviun qardaşı oğluna narkotik ittihamı irəli sürülüb (YENİLƏNİB)

Hazırda Fransada mühacirətdə olan “Azadlıq” qəzetinin baş redaktoru, “Azərbaycan saatı” proqramının rəhbəri Qənimət Zahidin qardaşı oğlu Rüfət Zahidova qarşı Cinayət Məcəlləsinin 234.4.1 (qnunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə  etmə, saxlama, daşıma, göndərmə və ya satma –qabaqcadan əlbir olan bir qrup şəxs tərəfindən və  ya mütəşəkkil dəstə tərəfindən törədildikdə) maddəsi ilə ittiham irəli sürülüb. Bu barədə  Turana hüquq mühafizə orqanlarındakı mənbələrdən bəlli olub.

Maddənin sankisyasında 5ildən 12 ilədək həbs nəzərdə  tutulur.

Rüfət Zahidov iyulun 20-də Bakıda saxlanılıb.

Atası Fərasət Zahidov Turana bildirib ki, oğlu əvvəlcə Daxili İşlər Nazirliyinin Baş Narkotiklə Mübarizə İdadəsinə aparılıb.

“Guya onun cibindən və avtomobilindən 5 qran heroin götürüblər. Bu ittiham tam uydurmadır. Oğlumu qardaşım Qənimət Zahidin journalist fəaliyyətinə görə tutublar. Bunu digər qardaşımın oğlunun, əmimin oğlunun həbsi də sübut edir. Hazırda qardaşım Əfqanın oğlunu da axtarırlar”, o qeyd edib.

Fərasət Zahidov bu gün Səbael rayon Polis İdarəsində işi aparan müstəntiq İlqar Həmidovla görüşüb. İlqar Həmidov ona oğlunun saxlanması ilə bağlı məlumat verib.

Öz növbəsində Səbael rayon Polis İdarəsindən Rüfət Zahidova qarşı cinayət ittihamının irəli sürülüb-sürülməməsi barədə məlumat almaq mükün olmayıb.-03B-

2015 İyul 21 (Çərşənbə axşamı) 11:22:57

Bazar ertəsi axşam Şamaxıda Rövşən Zahidov – “Azadlıq” qəzetinin redaktorunun əmisi oğlu saxlanılıb. Elə həmin gün məhkəmə onu 25 gün müddətinə həbs edib.

Eyni zamanda, Bakıda redaktorun qardaşı oğlu Rüfət Zahidov həbs edilib. O, narkotiklərə qarşı mübarizə idarəsində saxlanılır. Atasının sözlərinə görə, polis onu birbaşa paytaxtın Yasamal rayonundakı iş yerindən götürüb. Nədə ittiham olunduğu hələlik məlum deyil.

Bir gün əvvəl Şamaxı rayonunda redaktorun Tural adlı qardaşı oğlu polisə müqavimət ittihamı ilə həbs edilib.

Redaktor özü bildirib ki, bu həbslər ona “Azərbaycan saatı” İnternet TV proqramının yayımını dayandırması üçün təzyiq göstərmək məqsədi daşıyır. Qohumlarına qarşı repressiyalara baxmayaraq, Fransada mühacirətdə olan Qənimət Zahidov fəaliyyətini dayandırmaq niyyətində deyil. -02В-

2015 İyul 20 (Bazar ertəsi) 15:24:11

İyulun 18-də Şamaxı rayon Polis Şöbəsi “Azadlıq” qəzetinin mühacirətdə olan baş redaktoru və “Azərbaycan saatı” televiziya proqramının rəhbəri Qənimət Zahidin qardaşı Fərasət Zahidovun oğlu Tural Zahidovu Bakıda iş yerində saxlayıb. Şamaxı rayon Məhkəməsinin qərarı ilə Tural Zahidov barəsində 30 sutka inzibati həbs verilib. Bu barədə Qənimət Zahidov Facebook səhifəsində yazıb.

Xəbəri Şamaxı  rayon Polis Şöbəsinin növbətçi hissəsindən Turan-a təsdiq ediblər.

“Tural Zahidov Şamaxı rayon Məhkəməsinin qəraraı ilə İnqzibati Xətalar Məcəlləsinin 310-cu maddəsi (Polis işçisinin qanuni tələbinə qəsdən tabe olmama) ilə 30 sutka inzibati həbsə məhkum edilib”, deyə növbətçi hissədən bildirblər.

Zahidov “Azadlıq“ qəzetində dərc etdirdiyi “İnqilab başlayır. Kod adı: “Xədicə (Qənimət Zahidin anası nəzərdə tutulur-red) hərəkatı” adlı məqaləsində yazır ki, indi hakimiyyət, öz aləmində qohumlarımı mənə görə incitmək fikrinə düşüb.

Belə ki, polis iyulun 20-də Qənimət Zahidovun anası yaşayan rayonun Meysəri kəndinə gedib. Qənimət Zahidovun diqər qardaşı Əfqanı və oğlu Rüfəti də axtarıb.

Axtarış və həbs Ramazan bayramında Qənimət Zahidovun dostlarının və jurnalist həmklarlarının onun anası Xədicəni ziyarət etdikdən sonraya təsadüf edir. 

“Meysəridə, mənim anam, 87 yaşlı Xədicənin qapısını döyənləri, onun əhvalını soruşanları şübhəli şəxs qismində araşdırmağa başlayıblar. Görünür, hesab ediblər ki, Azərbaycan növbəti inqilab ərəfəsindədir və bu dəfə inqilabın lideri Xədicə Əlisahib qızı olacaq”, deyə jurnalist ironiya ilə yazır.

Qənimət Zahid Şamaxı polisinin nəzərinə çatdırır ki, Şamaxıda olan qohumlarının heç biri ilə əlaqə saxlamır.

“Ümumiyyətlə, mənim bu dünyaya gəlişimdə onların heç birinin günahı yoxdur. Dünyaya gəlişimdə, hal-hazırda mvcud olan səbəblərdən biri və yeganəsi anamdır, rayonun Meysəri kəndində yaşayır. Şərləyib həbs edə bilərsiz...”, deyə jurnalist bildirir.

Baş redaktor yazılarında heç kimi təhqir etmədiyini də xatıraldır. Halbuki, tribunası var və bunu etməyə imkanı var.  

“Mən peşəkar jurnalistika ilə məşğulam. Əndazələri aşmaqdan xoşum gəlmir. Söz ehtiyatı və istər yazı, istər də danışıq texnikası mənə imkan verərdi ki, bütün əndazələri də rahatlıqla aşa bilim. Amma çirkin texnologiyaları, elə, çirkin texnologiya sayıram. Anamın narahat edilməsini də çirkin texnologiya sayıram. Heç başqalarının anasını narahat etmədim”, deyə o, ailəsinə qarşı təzyiq edənlərə xatırladır. -03B-