QMİ: 20 yanvar hadisələri hələ də yetərli hüquqi-siyasi qiymətini almayıb

Qafqaz Müsəlmanları İdarəsi (QMİ) 1990-cı ilin 20 yanvar hadisələrinin növbəti ildönümü ilə bağlı bəyanat yayıb.

20 yanvar hadisələrinin üzərindən 25 ilin keçdiyi xatırladılan bəyanatda nə qədər zaman keçməsindən asılı olmadan bu hadisələrin unudulmayacağı vurğulanır. Sənəddə 20 yanvar şəhidləri “Dövlərçiliyin bərpası qurbanları, şəhidlik kimi uca zirvədə duran fədailər” kimi dəyərləndirilir.

Sənəddə Azərbaycan vətəndaşlarının yanvarın 20-də kütləvi qətliama məruz qoyulması xalqın sovet hökuməti tərəfindən cəzalandırılması hesab edilir.  

QMİ sədri şeyxülislam Allahşükür  Paşazadənin indi tarixi sənəd olan sovet rejimini tənqid edən bəyanatını o zaman SSRİ prezidenti Qorbacova ünvanlaması da bəyanatda yer alır.  

Bəyanatda 20 yanvar hadisələrinin hələ də tam beynəlxalq hüquqi, siyasi qiymətini almadığı  iddia edilir.

Bəyanatda Qarabağ probleminin indiyə kimi ədalətli həllini tapmaması 20 yanvar hadisələrinin zamanında yetərli hüquqi-siyasi qiymət ala bilməməsilə əlaqələndirilir.

Azadlıq, müstəqillik yolunun ağır olduğu deyilən sənəddə bu yolu qurban vermədən keçməyin mümkün  olmadığı yada salınır və Qarabağın azad olunmasına işarə ilə yenə də şəhidlər ola bilər xəbərdarlığı edilir. “Şəhidlik iman, vətən, əqidə uğrunda mübarizənin ən yüksək zirvəsidir. şəhidlərsə Allah imtahanından mərdliklə, fədakarlıqla çıxıb bu dünyada ölümsüzlüyü, axirətdə cənnəti qazananlardır”, - sənəddə şəhidliyin uca məqamına toxunulur.  

Müəlliflər Qarabağın azad olunmasını ölkə şəhidlərinin ruhuna ən yaxşı tövfə kimi dəyərləndirirlər.

Müəlliflər bütün məscidlərə 20 Yanvar günü bu bəyanatın mətnni oxumağı, şəhidlərin ruhlarına dualar oxunmasını tövsiyə edir.

Son olaraq Allah-u-Təaladan 20 Yanvar şəhidlərinə rəhmət istənilir.-05D-