Quba hadisələri üzrə ittiham olunanların bir qrupunun məhkəmə prosesi başlayıb

Bu gün Quba Rayon Məhkəməsində hakim Zamin Tahirovun sədrliyi ilə bu il martın 1-də rayonda baş vermiş iğtişaşlarla bağlı ittiham olunan bir qrup şəxsin işi üzrə hazırlıq iclası keçirilib. 8 nəfər – Fərhad Əbdürrəhmanov, Samir Xanmədov, Alxas Danyalov, Samir Talıbov, Mətləb Dadaşov, Sarvan Çobanov, Murat  Zakirov və Səxavət Ələsgərov məhkəmə qarşısında dayanıb. Onları hamısı sıravi vətəndaşlardır.

Xatırladaq ki, martın 1-də Qubanın keçmiş icra başçısı Rauf Həbibovun yerli sakinlərin ünvanına söylədiyi təhqiredici fikirlərdən hiddətlənən minlərlə qubalı rayon administrasiyasının qarşısında etiraz aksiyası  keçirib. R.Həbibovun istefası tələbilə keçirilən aksiya iğtişaşlara çevrilib. İğtişaşlar zamanı rayon icra başçısının villası və yardımçı tikililərin bir hissəsi yandırılıb.

Müttəhimlərə qarşı CM-in 186.2.2 (özgənin əmlakının məhv edilməsi və ona zərər vurulması), 233 (ictimai asayişin pozulmasına yönələn hərəkətlərin təşkili və ya onlarda fəal iştirak), 315.1-ci (hakimiyyət nümayəndəsinə müqavimət göstərilməsi və ona qarşı güc tətbiqi) maddələri ilə cinayət işi qaldırılıb.

Qeyd edək ki, sonuncu maddə ibtidai istintaqın sonunda irəli sürülüb. Bu o deməkdir ki, maksimum cəza 3 ildən 7 ilədək ola bilər.

İş üzrə 25 zərərçəkən, o cümlədən 23 polis əməkdaşı, rayonun keçmiş başçısı və rayon administrasiyası özü keçir.

Müttəhimlər irəli sürülən ittihamları rədd ediblər. Onların hüquqlarını dövlət vəkilləri müdafiə edir.

Hakim hazırlıq iclasında foto və videoçəkilişin aparılmasına icazə verməyib.

Məşvərət başa çatdıqdan sonra hakim işə baxılmasını sentyabrın 18-nə təyin edib. 

Quba hadisələri üzrə cinayət məsuliyyətinə 30-a yaxın adam cəlb olunub.—03C06—