Qubada həbs edilən dindarlar qanunsuz silah saxlamaqda ittiham olunurlar

Yanvarın 8-də Quba rayonunda saxlanılan yerli dindarlar Vəfanur Məmmərov və Nizami Nəcəfova qarşı Azərbaycan CM-in 228.2.1-ci (bir qrup şəxs tərəfindən qanunsuz silah və döyüş sursatı saxlanılması) maddəsi ilə ittiham irəli sürülüb. Dünən Bakının Səbail rayon məhkəməsi onlar barəsində 2 ay həbs qətimkan tədbiri seçib. Bu barədə Turan-a Qubalı hüquq müdafiəçisi, Vəfanur Məmmədovun qohumu Avtandil Məmmədov bildirib.

Vəfanur Məmmədovun qardaşı, yanvarın 9-da Qubada həbs edilmiş Vəfadar Məmmədov cümə günü barəsində qətimkan tədbiri seçilməsi üçün Səbail rayon məhkəməsinə gətirilib.

“Vəfadar Məmmədovun bu işlə ümumiyyətlə əlaqəsi yoxdur. O, uzun müddətdir Bakıda bənna işləyir. O, Qubaya qardaşı saxlanıldıqdan sonra gəlib. Gecə bizdə qalıb. Səhər Quba məhkəməsində atasının işi üzrə prosesə getdikdə onu da həbs ediblər. Vəfanur Məmmədov özü də radikal dindar deyil. Vəfanurun etdiyi tək şey “odnoklassniki” sosial şəbəkəsində digər  saxlanılan, bacanağı Nizami Nəcəfovun yazısına  şərh yazması olub”, deyə Avtandil Məmmədov bildirib.

Onun sözlərinə görə, Vəfanur Məmmədov evdə qumbara saxlamaqda ittiham olunur, lakin qumbara onların evinə qəsdən qoyulub.

“Bu ailəyə qarşı özbaşınalıq və ədalətsizlik edilir. Bu ailənin bütün kişiləri həbs edilib. Azərbaycan prezidenti İlham Əliyevi müdaxilə etməyi  və bu ədalətsizliyə son qoymağı xahiş edirəm”, deyə hüquq müdafiəçisi Avtandil Məmmədov bildirib. -06B-